A Asociación Galega da Crítica (AGC) e o Ateneo de Santiago celebran este xoves, día 23 de maio, ás 19:30 un encontro cos autores galegos galardoados cos Premios da Crítica 2023, o poeta Antón Lopo, pola obra Diarios / 1. Azul Monforte, e o xornalista Manuel Veiga, pola novela Perder as bestas.
No acto, que se levará a cabo en Afundación (Rúa do Vilar, 19), os premiados estarán acompañados pola poeta Ana Romaní e a profesora Dolores Vilavedra, así como os representantes das entidades organizadoras, Mario Regueira, da Asociación Galega da Crítica e Xosé Ramón Pousa, do Ateneo de Santiago.
Estes recoñecementos veñen entregándose pola Asociación Española de Críticos Literarios dende 1956, premiando os mellores libros de narrativa e poesía publicados no ano anterior, tanto en castelán como en galego, éuscaro e catalán.
