O candidato do PSdeG-PSOE á Alcaldía de Santiago, Pedro Blanco, anunciou a súa intención de impulsar un Plan Especial para o terceiro sector co que pretende ampliar o apoio do Concello ás entidades sociais de Compostela, incorporar novas medidas de acompañamento e aumentar os recursos municipais destinados ao seu labor. A proposta foi presentada durante unha visita á sede da Asociación ASPAS, dentro da rolda de encontros que o socialista está a realizar coa iniciativa ‘ConversasDeBarrio’. Blanco foi designado candidato socialista á Alcaldía e iniciou este mes estes contactos con barrios e colectivos da cidade de cara ás eleccións municipais de 2027.
“Queremos que o terceiro sector en Santiago sexa o primeiro sector. Que sexa de verdade unha prioridade na acción do goberno municipal”, afirmou Blanco durante o encontro. O candidato estivo acompañado polos concelleiros socialistas Marta Abal e Gumersindo Guinarte e coñeceu o traballo desenvolvido por ASPAS con persoas con discapacidade intelectual e as súas familias.
Blanco situou o futuro plan como unha ferramenta para reforzar a colaboración municipal co tecido social compostelán. “Son familias, son veciños e son persoas de Santiago. Entidades que moitas veces chegan onde non chegan as administracións”, sinalou, antes de defender que estas organizacións conten con máis recursos e respaldo do Concello.
A proposta atópase aínda nunha fase de elaboración. Segundo explicou o candidato socialista, os encontros coas asociacións servirán para recoller medidas e necesidades concretas que poidan incorporarse posteriormente ao plan. “Queremos que sintan o alento e o respaldo do Concello. Acompañalos con máis apoio, novas medidas e máis orzamento”, indicou. Ao mesmo tempo, Blanco apuntou cara á responsabilidade autonómica nalgunhas destas políticas e afirmou que “sabemos que as competencias son autonómicas e a Xunta ten que cumprir coa cidade”.
O socialista asegurou que o obxectivo é identificar propostas que permitan ofrecer unha resposta municipal máis rápida ás demandas das organizacións. “Queremos que Santiago dea un paso adiante, que avance”, sinalou durante a visita, na que tamén expresou a súa intención de que a cidade incremente o seu apoio ao terceiro sector.
A xornada de ‘ConversasDeBarrio’ inclúe tamén encontros coa veciñanza e co tecido asociativo de Laraño e Vidán. Esta iniciativa, iniciada a mediados de setembro, está levando o candidato socialista por diferentes barrios e parroquias para reunirse con asociacións e colectivos antes de concretar as súas propostas electorais. Nos últimos días, Blanco mantivo reunións con entidades da Cidade Histórica, Marantes ou Lavacolla dentro desta mesma rolda.
“Como digo sempre, escoitar para acertar. Iso é o que queremos facer: construír un proxecto entre todos e para todos”, explicou Blanco.
