As condicións meteorolóxicas complicaron este martes pola tarde a operativa do aeroporto de Santiago-Rosalía de Castro, onde a combinación de néboa e vento impediu a aterraxe de varios avións. En total, sete voos con destino a Compostela tiveron que ser desviados cara a outros aeroportos durante unha franxa de aproximadamente catro horas.
Segundo trasladou Aena a Europa Press, os desvíos producíronse entre as 19:00 e as 23:00 debido á “meteoroloxía adversa” rexistrada na contorna da terminal de Lavacolla. As aeronaves afectadas procedían tanto de destinos nacionais como internacionais e acabaron aterrando no Porto, Vigo e A Coruña.
O aeroporto portugués do Porto recibiu dous dos voos que inicialmente tiñan previsto chegar a Santiago. Tratábase dun avión de Vueling procedente de Palma de Mallorca e doutro de Ryanair que realizaba a conexión desde Dublín.
A maior parte dos desvíos concentráronse, con todo, no aeroporto de Vigo, ao que foron derivados catro voos. Tres deles estaban operados por Vueling e procedían de Londres, Sevilla e Barcelona, mentres que o cuarto chegaba desde Zúric e pertencía á compañía Edelweiss Air.
Pola súa banda, o aeroporto coruñés de Alvedro converteuse no destino alternativo dun voo procedente de Madrid, operado por Air Nostrum, que tampouco puido completar a súa ruta prevista ata Santiago.
