O Consello da Xunta declarou proxecto de interese autonómico (PIA) a reordenación da contorna do Complexo Hospitalario Universitario de Santiago de Compostela (CHUS), unha actuación que inclúe un novo aparcadoiro de 1.500 prazas e unha reforma integral dos accesos e da mobilidade na zona. A medida chega despois de anos de problemas de tráfico e estacionamento arredor do complexo hospitalario.
O conselleiro de Presidencia, Diego Calvo, explicou que esta declaración permitirá á Xunta “dispor canto antes dos terreos necesarios para mellorar os accesos e a mobilidade no futuro hospital”, que atende unha poboación de arredor de 426.000 persoas de 46 concellos. O proxecto está actualmente en fase de elaboración por parte da empresa adxudicataria Proyfe e a previsión é que estea listo a finais deste ano ou a comezos de 2027.
UN APARCADOIRO DE 1.500 PRAZAS
Un dos principais eixos da actuación será a ampliación da capacidade de estacionamento coa creación dun aparcadoiro de 1.500 prazas. A Xunta non fixa polo momento unha data concreta para a finalización destas obras, aínda que, co calendario actual, non se prevé que estean rematadas antes de 2028. Antes da execución definitiva, está prevista a habilitación dunha solución provisional de estacionamento. A reordenación contempla ademais unha circulación perimetral que permita separar os distintos tipos de tráfico, así como aparcadoiros situados no perímetro e conectados co complexo mediante itinerarios peonís accesibles. O obxectivo é tamén reducir a circulación e o estacionamento no interior do recinto hospitalario.
UNHA NOVA PRAZA ENTRE OS HOSPITAIS E PROTONTERAPIA
O proxecto aposta igualmente pola humanización dos espazos exteriores, coa incorporación de zonas verdes, arborado e novas áreas peonís. Entre as actuacións máis destacadas figura a creación dunha praza pública de acceso situada entre o Hospital Clínico, o Hospital Gil Casares e o futuro Centro de Protonterapia. Este último continúa avanzando na súa construción e a previsión da Xunta é que estea rematado a finais deste ano, co obxectivo de poder atender os primeiros pacientes a comezos de 2027.
AMPLIACIÓN DAS URXENCIAS E NOVO EDIFICIO C
Paralelamente á reordenación exterior, a Consellería de Sanidade traballa tamén na ampliación do servizo de Urxencias do hospital compostelán. A Xunta ultima ademais as obras do denominado Edificio C, que albergará os servizos de hospital de día e reprodución asistida. A previsión é que estas novas instalacións entren en funcionamento antes de que remate o ano.
