Dúas persoas resultaron feridas esta mañá nun accidente no coche co que circulaban por Santiago de Compostela. O turismo envorcou e ambas quedaron atrapadas no seu interior. Tras ser liberadas polo persoal de emerxencias, foron trasladadas en ambulancia ao hospital.
O accidente aconteceu pasadas as 08.40 horas e nel houbo unicamente un coche implicado. Segundo a información recollida polo 112 Galicia, o vehículo saíuse da vía e quedou envorcado nunha rotonda da Avenida do Cruceiro da Coruña, un viario que conduce ao polígono industrial compostelán. Había dúas persoas dentro do coche sen poder saír ao exterior.
A central de emerxencias compartiu a información co 061, os Bombeiros de Santiago e a Policía Local. Unha vez no punto, a dotación de bombeiros conseguiu liberar aos implicados usando o material de excarceración. Estes tiveron que ser trasladados ata o hospital polo persoal sanitario.
