A Xunta de Galicia trasladará desde Uruguai a escultura ‘A Santa’, unha das obras máis representativas de Francisco Asorey, coincidindo co centenario da súa creación. A peza, propiedade da Administración autonómica desde 2022, poderá contemplarse de maneira permanente na Cidade da Cultura, en Santiago de Compostela, tras permanecer máis de setenta anos en Montevideo.
A Consellería de Cultura destaca que ‘A Santa’ é unha das creacións máis relevantes da escultura galega do século XX e un símbolo da memoria artística e da emigración galega. A obra foi presentada en 1926 na Exposición Nacional de Belas Artes de Madrid e, en 1951, foi adquirida pola colectividade galega emigrante en Montevideo, onde permaneceu exposta durante décadas. A Xunta recuperouna en 2022 no proceso de adquisición de bens da Casa Galicia da capital uruguaia.
Inicialmente, a escultura quedou depositada no Museo Zorrilla de Montevideo tras un acordo entre os gobernos de Galicia e Uruguai. Porén, a reorganización da colección e do discurso expositivo deste museo levou ambas as administracións a acordar o seu traslado definitivo a Galicia para favorecer unha mellor contextualización, conservación e difusión da obra.
Antes da súa instalación definitiva, ‘A Santa’ xa formou parte da exposición ‘Galicia, un relato no mundo’, organizada na Cidade da Cultura e visitada por máis de 46.000 persoas. O regreso da escultura foi posible grazas á colaboración entre a Xunta, o Goberno de Uruguai, o Museo Zorrilla e as colectividades galegas da diáspora.
