O XIX Premio Internacional Compostela para Álbums Ilustrados xa ten obra gañadora. A alcaldesa de Santiago, Goretti Sanmartín, anunciou este luns o fallo do xurado dun certame ao que concorreron 265 proxectos procedentes de diferentes países europeos e latinoamericanos, unha cifra que, segundo destacou, confirma a continuidade dun premio “absolutamente consolidado” no ámbito do álbum ilustrado.
A obra gañadora é El Hombre y la Luna, asinada polos italianos Paolo Domeniconi e Guia Risari. Sanmartín explicou que se trata dun traballo arredor da lúa, da súa presenza simbólica e da procura da beleza a través do desexo de alcanzala. A alcaldesa definiu a proposta como un álbum que aborda “un tema universal” cunha dimensión visual e literaria que foi salientada polo xurado.
O premio suporá a edición da obra nas cinco linguas peninsulares, dentro da colaboración entre o Concello de Santiago e a editorial Kalandraka, promotora do certame xunto á administración municipal. A presentación pública do libro terá lugar nos próximos meses, cando os autores se despracen a Compostela para dar a coñecer o proxecto premiado.
Ademais da obra gañadora, o xurado recoñeceu como finalista Contar a Tedez, da autora arxentina Ailin Monjeau. Segundo explicou Sanmartín, o álbum propón un percorrido por unha cidade viva a través dunha estrutura numérica, na que van aparecendo diferentes persoas, espazos e relacións ata conformar unha imaxe colectiva da vida urbana. A alcaldesa sinalou que a obra fala de cidades “vivibles” e dos vínculos que se xeran entre quen as habitan.
A calidade deste traballo levou tamén a Kalandraka a asumir a súa publicación, polo que Contar a Tedez chegará igualmente ás librarías. Sanmartín puxo o foco en que tanto esta obra como a recoñecida co accésit son primeiros proxectos das súas autoras, unha circunstancia que, ao seu xuízo, amosa a capacidade do premio para abrir espazo a novas voces no ámbito da ilustración e da literatura infantil.
O accésit foi para Morada, da portuguesa María Luisa Ornelas, un álbum sen palabras que aborda a dificultade de atopar un fogar. A alcaldesa indicou que a obra trata “un tema absolutamente básico, fundamental”, como é a vivenda, a través dunha protagonista e da figura dun gato, empregando exclusivamente as ilustracións para construír o relato.
Sanmartín subliñou que o Premio Compostela cumpre unha dobre función: por unha banda, recoñecer o traballo de creadoras e creadores cunha traxectoria xa consolidada, como acontece nesta edición cos autores italianos distinguidos co primeiro premio; e, por outra, dar visibilidade a novas autoras que presentan as súas primeiras obras. “Conseguimos que haxa novos valores, nova xente a quen se lle está dando unha oportunidade”, afirmou.
A rexedora tamén agradeceu o labor do xurado, integrado por Mercé Gali, José Luis Polanco, Yara Kono, Xosé Cobas e Manuela Rodríguez, de Kalandraka. Sanmartín incidiu na complexidade de avaliar 265 propostas e destacou o traballo realizado para seleccionar as obras recoñecidas nesta edición.
A alcaldesa pechou a presentación avanzando que Compostela acollerá nos vindeiros meses a presentación de El Hombre y la Luna, unha obra que, sinalou, chega nun momento no que a lúa volverá ter presenza no debate público pola proximidade dun eclipse.
O CONCELLO ESTUDARÁ O PROXECTO DO NOVO APARCADOIRO DO CHUS
Preguntada polo proxecto presentado pola Xunta para o novo aparcadoiro do Complexo Hospitalario Universitario de Santiago, con arredor de 1.500 prazas e unha solución provisional doutras 500, Sanmartín indicou que o Concello fará unha valoración detallada cando os servizos municipais poidan analizar a documentación.
A alcaldesa explicou que a administración autonómica se comprometeu a remitir nos próximos días o PIA para o seu estudo. Nunha primeira valoración, sinalou que ao Goberno local “non lle parece mal” a nova localización prevista nin o incremento de prazas, aínda que lamentou que os aparcadoiros provisionais non estivesen xa habilitados tendo en conta os prazos que require a licitación e construción do aparcadoiro definitivo.
Sanmartín lembrou que o Concello xa puxera no seu día unha parcela a disposición das persoas usuarias do CHUS e insistiu na necesidade de axilizar tanto a solución provisional como o proxecto definitivo. Tamén valorou que se vaia executar a obra da glorieta da Volta do Castro, unha actuación que o Concello considera relevante para mellorar a accesibilidade da contorna hospitalaria.
SANMARTÍN EVITA A POLÉMICA POLA REUNIÓN COA XUNTA
Sobre as declaracións da titular autonómica de Vivenda, que cuestionou a ausencia da alcaldesa nunha reunión sobre o aparcadoiro, Sanmartín respondeu que non quere abrir “ningún tipo de controversia” e que o obxectivo municipal é que a infraestrutura se constrúa “canto antes”.
A rexedora indicou que o Concello estivo representado na comisión de seguimento e reiterou a súa disposición a colaborar para que o aparcadoiro definitivo e as solucións provisionais poidan avanzar.
A ALCALDESA ESPERA QUE AS ACAMPADAS NOS SOPORTAIS DE RAXOI SEXAN PUNTUAIS
Sanmartín tamén foi preguntada polos desaloxos de persoas acampadas nos soportais do Pazo de Raxoi, rexistrados en días consecutivos. A alcaldesa confiou en que non se converta nunha conduta habitual e sinalou que a maioría das persoas que visitan Santiago respectan as normas básicas de convivencia.
“Espero que non”, respondeu sobre a posibilidade de que estes episodios se repitan, antes de engadir que confía en que se trate dunha situación puntual.
