O Festival Atlántica celebrará a súa décimo cuarta edición entre o 26 de xuño e o 10 de xullo cunha programación máis ampla en duración, territorio e número de participantes. A cita, presentada en Santiago de Compostela, chegará este ano a 33 localidades galegas, oito máis que na edición anterior, e contará con 62 espazos escénicos e 50 artistas procedentes de Galicia, Portugal, Navarra, Zamora, Huelva e Colombia.
A directora do festival, Soledad Felloza, sinalou durante a presentación que o crecemento da programación amosa “que tras trece edicións, o Festival Atlántica revélase como un importante creador de públicos e novos escenarios para a narración oral galega aínda en crecemento”. A edición de 2026 incorpora cinco días máis respecto da anterior e mantén a aposta pola descentralización da actividade cultural, con presenza nas catro provincias galegas.
O anuncio da programación tivo lugar en Santiago, coa participación da concelleira de Capital Cultural, Turismo, Educación e Memoria Histórica, Míriam Louzao; o director xeral de Cultura da Xunta de Galicia, Anxo M. Lorenzo; o alcalde de Dodro, Francisco X. Castro; a alcaldesa de Vimianzo, Mónica Rodríguez; o alcalde de Pazos de Borbén, Luciano Otero; o alcalde de Outes, Francisco Calo; e a concelleira de Cultura e Turismo de Teo, Mª Margarita Rosende, ademais de representantes da organización.
O festival conta co patrocinio da Xunta de Galicia, da Deputación da Coruña e da Deputación de Lugo, así como co apoio dos concellos participantes, entre eles o Concello de Santiago de Compostela, onde se realizou a presentación desta nova edición.
A directora definiu Atlántica como “un festival maduro, cunha identidade consolidada e cunha rede de colaboración que medrou co tempo”. Nese sentido, lembrou que varias das persoas que hoxe forman parte da escena galega da narración oral iniciaron a súa relación profesional co festival, que nos últimos anos contribuíu á creación de novos públicos e circuítos arredor da palabra escénica.
Segundo explicou Soledad Felloza, a programación mantén como eixo a defensa dos espazos de encontro. “Nun momento marcado pola velocidade e pola desconexión humana, seguimos reivindicando a importancia dos circuítos profesionais e dos espazos de encontro. Traballamos cunha arte milenaria, pero tentando responder a unha necesidade moi contemporánea: volver atoparnos”, afirmou.
A responsable do festival indicou tamén que Atlántica busca contribuír á consolidación dun ecosistema cultural “diverso, descentralizado e conectado co territorio”, no que poidan relacionarse creadoras, institucións e públicos. Para a organización, a narración oral mantén un valor artístico, mais tamén unha función comunitaria, ao favorecer a participación cultural e o diálogo entre xeracións.
Un dos trazos centrais desta edición será a relación entre patrimonio material e patrimonio inmaterial. Durante quince días, o festival levará espectáculos, roteiros, visitas guiadas, conferencias e lecturas a castelos, castros, petróglifos, mámoas, lavadoiros, eiras, airas, pozos do liño, escolas indianas, museos, bibliotecas, xardíns botánicos, sendas ecolóxicas, centros culturais e outros espazos singulares.
A programación chegará a concellos como A Coruña, Santiago, Ferrol, Mugardos, Teo, Ribeira, Vimianzo, Ourense, Castroverde, Quiroga, Taboada, A Fonsagrada ou Xunqueira de Ambía, entre outras localidades. A organización subliña que esta distribución permite conectar ámbitos urbanos e rurais a través da palabra contada e reforzar a presenza da cultura oral en espazos non sempre vinculados aos circuítos escénicos habituais.
Nesta décimo cuarta edición continuará tamén o Ciclo Novas Voces, con actividade en sedes como Santiago, Mugardos, Ribeira, Pazos de Borbén, Outes ou A Fonsagrada. A iniciativa procura abrir espazos profesionais para creadoras e creadores emerxentes, en diálogo con artistas con traxectoria consolidada. O ciclo conta coa colaboración doutros proxectos e festivais, como AHOZ AHOZ de Guipúscoa, o Festival de Zamora e a Escola Superior de Arte Dramática de Galicia.
Entre as persoas participantes neste apartado figuran Amaia Elizagoien, Esmeralda Folgado, Fernando Palitos e Santiago Giraldo, coñecido como Profe Kuro. A través deste ciclo, o festival mantén a súa aposta pola renovación da escena da palabra, pola experimentación escénica e pola incorporación de novas linguaxes á tradición oral.
A dimensión internacional e ibérica tamén terá continuidade nesta edición. Xunto á representación galega, o programa incluirá artistas de Portugal, País Vasco, Zamora, Huelva e Colombia, mantendo o intercambio transfronteirizo e ampliando os vínculos con proxectos arredor das artes escénicas da palabra. A programación incluirá propostas para público adulto, familiar e infantil, ademais de estreas, lecturas públicas, conferencias e actividades vinculadas á memoria popular.
A edición de 2026 incorporará ademais propostas relacionadas co legado de Ramón Otero Pedrayo, coincidindo co 50 aniversario do seu falecemento. A organización sinala que esta presenza busca reforzar o diálogo entre tradición e contemporaneidade e manter o vínculo do festival coa memoria cultural de Galicia.
Outro dos momentos destacados será a lectura pública da obra de Begoña Caamaño, realizada coa colaboración de ASPANAES e aberta á participación da sociedade galega. O festival presenta esta actividade como unha mostra da súa dimensión comunitaria e inclusiva, ao incorporar entidades sociais e favorecer a participación colectiva arredor da literatura e da palabra.
No apartado de recoñecementos, a Cornamusa de Honra será entregada á profesora e investigadora Camiño Noia, especialista no estudo e difusión do conto popular e da tradición oral galega. A homenaxe pon o foco no papel das mulleres tanto na transmisión como na investigación da cultura oral.
A accesibilidade volverá formar parte da programación. Varias propostas contarán con interpretación en lingua de signos, dando continuidade a unha liña de traballo que o festival mantén desde hai anos. A diversidade tamén estará presente coa participación do artista non vidente Francisco de Romualdo e en proxectos desenvolvidos coa comunidade, como a lectura pública de textos de Begoña Caamaño.
