A Alameda de Santiago será o escenario os días 11 e 12 de xuño da III Semana da Prevención de Incendios, unha iniciativa impulsada polos bombeiros de Santiago en colaboración coa Fundación Mapfre e a Asociación Profesional de Técnicos de Bombeiros, APTB. O programa inclúe actividades orientadas a mellorar a capacidade da veciñanza para identificar riscos nos fogares, nos centros de traballo ou nos espazos educativos, así como para saber como actuar ante unha situación de emerxencia.
O concelleiro de Mobilidade, Convivencia e Centros Socioculturais, Xan Duro, explicou que estas xornadas buscan “sensibilizar á cidadanía, axudarlle a identificar os riscos que se poden presentar nos nosos lugares cotiáns, como os nosos fogares, lugares de traballo ou colexios; e trasladarlle os coñecementos necesarios para actuar diante dunha emerxencia”.
A programación desenvolverase durante dúas xornadas na Alameda, cunha parte importante das mañás reservada para visitas de escolares. Para o alumnado organizaranse diferentes obradoiros adaptados ás crianzas, co obxectivo de introducir desde idades temperás pautas básicas de prevención e resposta ante incendios ou outros incidentes.
Un dos elementos centrais da actividade será a ‘Casiña do Fume’, unha instalación pensada para explicar, especialmente ás nenas e nenos, que deben facer se se declara un incendio nunha vivenda. A través desta proposta, os participantes poderán aprender como orientarse nun espazo cheo de fume, cales son os comportamentos máis seguros e de que maneira deben reaccionar nunha emerxencia destas características.
Ademais, a III Semana da Prevención de Incendios incluirá obradoiros de manexo de extintores, actividades de reanimación cardiopulmonar e primeiros auxilios en colaboración co 061, unha exposición de traxes de intervención e vehículos de emerxencias, así como diferentes demostracións a cargo dos bombeiros.
Na iniciativa tamén participarán Protección Civil, a Policía Local, o 061 e a Policía Nacional, nun dispositivo divulgativo que procura achegar á cidadanía o traballo dos servizos de emerxencia e reforzar a cultura da prevención.
Xan Duro lembrou que os últimos datos da Fundación Mapfre e da APTB apuntan a que no pasado inverno morreron en España 92 persoas en incendios e explosións, das cales 85 faleceron en incidentes rexistrados en vivendas. Segundo estas cifras, o 77% dos falecementos produciuse por inhalación de fume.
O edil sinalou que, malia que en Santiago non se rexistraron vítimas mortais por incendios nos últimos anos, resulta necesario manter as medidas de concienciación e formación. “É importante non baixar a garda e reforzar a prevención, xa desde a infancia”, indicou.
Duro tamén puxo en valor o traballo que realizan os bombeiros de Santiago no ámbito preventivo, tanto a través deste tipo de campañas como mediante accións de formación e divulgación dirixidas á poboación. A Semana da Prevención de Incendios volverá así á Alameda como un espazo aberto para aprender a reducir riscos e mellorar a resposta cidadá ante situacións de emerxencia.
