O 77 % dos turistas que visitan Santiago non son peregrinos, fan un gasto medio de 25 euros ao día —lixeiramente por riba do dos residentes— e perciben o casco vello da cidade non como un barrio de verdade, senón como un “espazo deshabitado”. Estas son as conclusións dun estudo da Rede Galabra de Estudos na Cultura, na que participa profesorado da USC, que acaba de presentar os resultados dunha investigación que analizou a poboación local, o comercio e as persoas visitantes de Compostela para coñecer en detalle a súa interacción.
A primeira cuestión que desmente o informe é que “o turismo que enche as rúas de Santiago proveña do Camiño”. De feito, nas enquisas realizadas entre 2022 e 2023 recóllese que máis do 77 % non son peregrinos, fronte ao 22,7 % que si o son. En canto á súa experiencia na cidade, a enquisa revela que descobren “unha cidade humana e acolledora”, valorando a súa escala e a vida máis alá das grandes pedras monumentais. Con todo, a Catedral e o seu contorno monopolizan a maior parte do turismo.
Porén, os visitantes non consideran maioritariamente o casco vello como un barrio de verdade, senón como un “espazo deshabitado”. Disto deriva unha correlación clara no informe: “Se o turismo expulsa o veciño, o turismo percibe un barrio fantasma”. No que respecta ao seu vínculo co comercio local, a análise evidencia que o turista “consume e mira escaparates, pero faino mentres deambula; non é o seu obxectivo previo”.
COMERCIANTES E POBOACIÓN LOCAL
Nas enquisas recóllese unha “sensación xeneralizada” de que o casco histórico sobrevive “grazas ao turismo”. De feito, máis da metade dos comerciantes sinalan que o visitante gasta máis diñeiro que as persoas locais. Con todo, os datos indican que o 58,5 % dos comercios viven do consumidor local. A única diferenza radica no volume de gasto: unha media de 25 euros diarios por parte dos turistas, fronte aos 20 euros diarios dos locais. Por outra banda, algo máis do 51 % da poboación compostelá preferiría outro modelo turístico. Finalmente, existe un “enorme consenso local” en que o casco vello non debería destinarse só ao turismo.
