A modificación puntual do Plan Xeral de Ordenación Municipal (PXOM) de Santiago para os terreos do antigo colexio Manuel Peleteiro entrou este martes na súa fase definitiva coa publicación no Diario Oficial de Galicia (DOG) do anuncio da súa aprobación.
O cambio urbanístico fora avalado polo pleno municipal celebrado no pasado mes de marzo e redefine os usos permitidos nesta parcela situada no Ensanche compostelán. Entre as principais novidades figura a reserva de, cando menos, un 45% da nova edificabilidade residencial para vivenda protexida, unha medida coa que se busca incrementar a oferta de inmobles de acceso regulado nunha das zonas con maior presión urbanística da cidade.
A modificación tamén introduce cambios significativos nos usos previstos para o ámbito. O documento establece que o uso residencial pasa a ser o característico, ao tempo que elimina a posibilidade de destinar os terreos a un establecemento hoteleiro. Ademais, co obxectivo de preservar o tecido comercial da contorna, impídese a implantación dun centro comercial de grandes dimensións.
No apartado urbanístico, a revisión reduce a edificabilidade lucrativa prevista inicialmente. Así, o volume construíble pasa de 23.500 a 19.000 metros cadrados, o que supón unha diminución da capacidade edificatoria contemplada nas propostas anteriores para o solar.
O planeamento incorpora tamén cambios na configuración dos espazos públicos. Entre eles destaca a creación dunha nova praza orientada cara á rúa de San Pedro de Mezonzo, na súa fachada suroeste, que contará cun acceso amplo e aberto desde a rúa da República Arxentina, ao norte da parcela. O obxectivo é mellorar a permeabilidade urbana e a conexión deste ámbito co resto do barrio.
A publicación do acordo no DOG abre igualmente o período para a presentación de recursos. Segundo recolle o anuncio oficial, contra a aprobación definitiva da modificación do PXOM poderá interpoñerse un recurso contencioso-administrativo ante o Tribunal Superior de Xustiza de Galicia (TSXG) no prazo de dous meses, contados desde este mércores.
