A Consellería de Sanidade adxudicou o servizo de mantemento de xardíns e patios interiores de 16 centros de atención primaria da área sanitaria de Santiago de Compostela e Barbanza por un importe de 66.357,37 euros. A actuación terá especial incidencia na contorna compostelá ao incluír varios centros situados na capital galega e na súa área metropolitana.
Segundo informou a Xunta, o contrato foi asignado á empresa Properdis empresa de inserción laboral, S.L., que asumirá durante os próximos 24 meses os traballos de conservación e coidado dos espazos exteriores, cunha posible prórroga adicional de ata 12 meses.
No ámbito máis próximo a Santiago, as actuacións desenvolveranse nos centros de saúde de Fontiñas, Galeras e Vite, así como nos de O Milladoiro, Boqueixón, Brión e Bembibre, no Val do Dubra. O contrato abrangue tamén outros centros da área sanitaria situados en localidades como Carnota, Pontecesures, Vila de Cruces, Muros, A Estrada, Silleda, Valga, Bertamiráns e o Centro Integral de Saúde de Lalín.
A intervención inclúe labores periódicos de mantemento das zonas verdes e patios interiores dos edificios sanitarios. Entre os espazos que contan con maior superficie de actuación destacan o Centro Integral de Saúde de Lalín, con arredor de 4.100 metros cadrados, seguido do centro de saúde e punto de atención continuada de Muros, con máis de 3.600 metros cadrados, e do centro e PAC da Estrada, con preto de 2.600 metros cadrados.
A Xunta sinala ademais que o contrato incorpora criterios vinculados á sustentabilidade ambiental, entre eles actuacións relacionadas coa reciclaxe e compostaxe dos residuos vexetais xerados, así como a retirada de especies invasoras presentes nas zonas incluídas no servizo.
