O Grupo Municipal Socialista de Santiago cuestionou o grao de cumprimento do Pacto Local polo Rural por parte do Goberno municipal e advertiu do aumento do descontento entre a veciñanza das parroquias compostelás. A concelleira Marta Abal asegurou que os compromisos asumidos no marco deste acordo non se están a desenvolver segundo o previsto e vinculou esta situación coa falta de avances en cuestións consideradas prioritarias para o territorio rural.
A edil socialista sinalou que transcorreron máis de tres anos desde a sinatura do pacto e sostivo que a situación actual está marcada polo malestar existente entre o tecido veciñal. Segundo indicou, esta percepción foi trasladada recentemente pola Federación de Asociacións Veciñais do Rural, que expresou preocupación pola evolución dos compromisos adquiridos.
Abal defendeu que o acordo recollía actuacións destinadas a reforzar os servizos públicos, favorecer a fixación de poboación e mellorar as condicións de vida nas parroquias, especialmente nas zonas do norte do municipio. Porén, sostivo que as medidas previstas non están a avanzar ao ritmo esperado.
A representante socialista lembrou tamén as críticas realizadas polo seu grupo durante o proceso de negociación dos orzamentos municipais. Neste sentido, apuntou á obriga de reservar un 1% do orzamento municipal para actuacións no rural, un compromiso que, segundo afirmou, non se estaría executando nas condicións inicialmente previstas. Ademais, indicou que o Goberno local pretendía incorporar nesta porcentaxe fondos procedentes do Plan de Obras e Servizos (POS) da Deputación.
Outra das cuestións sinaladas polo PSdeG foi a relación coa veciñanza e coas entidades das parroquias. A concelleira advertiu de que a situación non se limita unicamente ao nivel de investimento, senón que tamén afecta aos mecanismos de participación e comunicación coa cidadanía.
Neste contexto, Abal cuestionou a falta de información sobre os proxectos previstos para cada parroquia e asegurou que non se están incorporando de maneira suficiente as demandas veciñais á toma de decisións. Como exemplo, referiuse ao novo contrato do transporte urbano, afirmando que a definición de rutas e frecuencias se realizou sen contar coa opinión das persoas usuarias habituais do servizo.
Os socialistas insistiron na necesidade de reforzar a planificación, incrementar os investimentos e manter unha interlocución continua co tecido veciñal para evitar, segundo sinalaron, unha perda progresiva de dinamismo nas parroquias compostelás.
