O Concello de Santiago recibiu este sábado a un grupo de peregrinos vinculados á Fundación Pequeño Valiente, unha entidade sen ánimo de lucro de Canarias dedicada ao acompañamento de nenos, nenas e adolescentes con cancro, así como das súas familias. O acto institucional contou coa presenza do concelleiro Xesús Domínguez, acompañado por outras integrantes da Corporación municipal.
A fundación desenvolve un labor de acompañamento ás persoas enfermas e ás súas contornas familiares ao longo das distintas fases do proceso, prestando apoio emocional, social e práctico co obxectivo de contribuír a que as familias conten con recursos e acompañamento continuado.
Durante a recepción, o representante municipal fixo entrega ao presidente da entidade, Jesús Jerez, dunha lámina das Dúas Marías como recordo da visita realizada á capital galega. O agasallo está vinculado a un dos símbolos máis recoñecibles da cidade, representado polas figuras de Maruxa e Coralia, presentes na Alameda compostelá.
No encontro, Xesús Domínguez tamén convidou ás persoas participantes na peregrinación a coñecer distintos espazos verdes e parques da cidade, facendo unha mención especial á Alameda de Santiago, un dos lugares máis representativos do municipio e espazo onde se atopa a coñecida escultura das Dúas Marías.
