O Grupo Municipal Socialista de Santiago anunciou que presentará no próximo Pleno unha iniciativa para reclamar actuacións inmediatas de conservación e mantemento no Casco Histórico, tras denunciar o estado que presentan distintos muros e elementos patrimoniais da cidade.
A concelleira socialista Marta Abal asegurou que diferentes puntos do centro histórico mostran sinais de deterioro derivados, segundo indicou, da falta de actuacións continuadas. A edil afirmou que a cidade ofrece unha “imaxe de abandono impropia dunha cidade Patrimonio da Humanidade”, en referencia á presenza de vexetación sen controlar, maleza e espazos que, ao seu xuízo, presentan un estado deficiente de conservación.
Entre os lugares sinalados polo grupo socialista atópanse o muro da Praza de Abastos e o entorno do convento de San Paio, na rúa da Conga. Segundo Abal, trátase de exemplos visibles dunha situación que considera reiterada en diferentes zonas do casco vello compostelán.
A concelleira vinculou esta situación coa falta de planificación por parte do executivo municipal e criticou que non se estean a desenvolver medidas preventivas de conservación. Neste sentido, lembrou que o Pleno municipal aprobou no mes de xuño do ano pasado unha proposta socialista orientada á creación dun plan anual de mantemento de infraestruturas, espazos e elementos urbanos para o conxunto da cidade.
Porén, segundo sostivo, pasado case un ano desde aquela aprobación, continúan detectándose problemas de conservación, incluídos espazos considerados especialmente sensibles polo seu valor histórico e patrimonial.
“O máis grave é que falamos dunha situación reiterada e visible nun dos espazos máis importantes da cidade, precisamente onde debería existir máis coidado e máis planificación”, sinalou Abal, quen tamén advertiu de que o Goberno local “non pode seguir actuando só cando hai denuncias públicas ou críticas veciñais”.
A proposta que o grupo socialista presentará no Pleno solicita actuacións de limpeza, mantemento e conservación dos elementos patrimoniais de titularidade municipal, así como a realización de inspeccións e requirimentos nos casos de propiedades privadas para garantir un estado adecuado de conservación.
Para a edil socialista, a situación actual tamén pon de manifesto a necesidade de contar cun sistema de mantemento estable e preventivo. “Santiago non pode permitirse ter o seu patrimonio nun estado de abandono mentres o Goberno municipal segue sen cumprir os acordos aprobados no propio Pleno”, concluíu.
