O Concello de Santiago celebrará o vindeiro 19 de maio ás 11:00 no Pazo de Raxoi o acto oficial no que se presentarán os tres anteproxectos finalistas do Concurso Internacional de Iluminación ‘Compostela nocturna, mírame!’, unha iniciativa destinada a redefinir a iluminación monumental da contorna da Catedral e a transformar a percepción nocturna dun dos espazos patrimoniais máis significativos da cidade.
Durante a xornada darase a coñecer publicamente o contido técnico das tres propostas finalistas e entregarase o premio ao estudo gañador, Intervento, autor do proxecto presentado baixo o lema ‘Hermes’. O acto contará tamén coa participación dos outros dous equipos seleccionados, Valoa Design e o grupo encabezado por Studio Piero Castiglioni, xunto con Marco Petrucci e F&M Ingegneria, que exporán as súas visións sobre a iluminación deste ámbito histórico.
Segundo o fallo do xurado internacional, ‘Hermes’ acadou 95 puntos sobre 100, fronte aos 65 puntos obtidos polas outras dúas candidaturas. A proposta foi recoñecida pola súa “claridade e integridade”, apostando por un sistema de gradientes e contrastes que busca resaltar a arquitectura histórica sen alterar a súa lectura patrimonial. Entre os elementos máis valorados figura o feito de evitar novas instalacións sobre as cubertas da Catedral, así como a previsión dunha redución estimada do consumo enerxético do 68% respecto ao modelo actual, combinando criterios patrimoniais, económicos e ambientais.
O programa desenvolverase inicialmente no Salón Vermello do Pazo de Raxoi, onde se abordará o contexto técnico do concurso, se realizarán as intervencións institucionais e se procederá á entrega oficial do galardón. Posteriormente, abrirase na Casa do Cabido a exposición ‘Compostela Nocturna Mírame!’, unha mostra divulgativa que permitirá coñecer tanto o simbolismo histórico da luz en Santiago como os detalles técnicos das tres propostas finalistas. A presentación completarase cunha explicación in situ na praza das Praterías sobre o proxecto piloto previsto para este espazo.
A exposición poderá visitarse entre o 19 e o 31 de maio na Casa do Cabido e incluirá visitas guiadas gratuítas os días 21, 26 e 28 de maio ás 18:30, sen inscrición previa ata completar capacidade. Posteriormente, a mostra trasladarase á Casa das Asociacións de Cornes entre o 1 e o 8 de xuño, ampliando así o acceso cidadán ao proceso.
Esta actuación forma parte do Plan de Sostibilidade Turística en Destino (PSTD) de Santiago de Compostela, impulsado polo Concello, a Xunta de Galicia e a Secretaría de Estado de Turismo, cun proceso coordinado tecnicamente pola empresa compostelá Trivium.
