O portavoz do Partido Popular en Santiago, Borja Verea, afirmou este venres que a declaración de zona tensionada na cidade responde a unha decisión política do goberno local, integrado por BNG e Compostela Aberta, e asegurou que “as consecuencias desta medida serán responsabilidade exclusiva de quen a impulsou”.
Durante unha rolda de prensa inicialmente convocada para abordar a situación das parcelas non cedidas polo Concello á Xunta, o edil centrou a súa intervención na recente decisión sobre o mercado residencial. Segundo indicou, esta medida chega tras “tres anos nos que o único que presentou o Concello foi unha proposta que non saíu adiante e que tardou meses en corrixirse”.
Verea puxo en dúbida a eficacia da declaración de zonas tensionadas noutras cidades, asegurando que “está demostrado que non funciona” e advertindo de posibles consecuencias como a redución da oferta de alugueiro, a saída de vivendas do mercado ou o aumento das dificultades de acceso, especialmente para familias e xente nova. “Limitar prezos sen aumentar a oferta é a receita perfecta para que haxa menos vivenda”, sinalou.
Como exemplo, referiuse á cidade da Coruña, onde, segundo expuxo, se produciu unha diminución no número de contratos de alugueiro tras a aplicación desta medida. “Pasouse de 718 contratos en xullo a 324 en febreiro, o que supón unha caída do 55% da oferta”, indicou.
O portavoz popular tamén criticou a ausencia de políticas municipais de promoción de vivenda pública en Santiago. Neste sentido, afirmou que “non se construíu ningunha vivenda pública municipal nin se puxo en marcha alugueiro público” e cuestionou a falta de avances na creación dunha empresa municipal neste ámbito.
Ademais, comparou a situación compostelá con outros concellos galegos, como Ames, Pontevedra, Teo ou A Coruña, nos que, segundo indicou, se cederon terreos á Xunta para a construción de vivenda protexida. “Santiago, despois de tres anos, segue en cero”, subliñou.
Verea tamén criticou a decisión do goberno local de vender parcelas públicas en lugar de cedelas, o que, ao seu xuízo, supón “perder a oportunidade de contar con centos de vivendas públicas en construción”. Segundo explicou, o Concello obtivo arredor de cinco millóns de euros por estas operacións, unha decisión que cualificou de “política” e que contrapuxo á opción de incrementar o parque público de vivenda.
Preguntado polos datos que apuntan a unha moderación dos prezos do alugueiro en cidades con zona tensionada, Verea cuestionou que este efecto compense a posible redución da oferta. “É mellor ter prezos que medran menos ou non ter pisos dispoñibles?”, expuxo.
Na quenda de preguntas, o portavoz popular tamén se referiu á recente instalación dunha estatua de Moncho Reboiras en Santiago, criticando a súa localización e asegurando que “rompe co consenso e coa neutralidade”. Neste sentido, afirmou que, de acceder á alcaldía, retiraría a escultura do seu emprazamento actual.
