O Concello de Santiago deu a coñecer a marca, símbolo e identidade gráfica dos Xogos do Eixo Atlántico, que se celebrarán na cidade entre o 5 e o 10 de xullo, nun acto no que participaron a alcaldesa, Goretti Sanmartín, a concelleira de Deportes, Pilar Lueiro, e a deseñadora Thais Suárez.
Durante a presentación, a rexedora salientou que estes xogos converterán Compostela nun “punto de encontro xuvenil de máximo nivel”, cun evento que reunirá a delegacións galegas e portuguesas arredor do deporte e da convivencia. “Vai haber competición, pero tamén moitas amizades e socialización entre a mocidade”, indicou.
O programa desenvolverase ao longo de cinco días, cun acto inaugural previsto para o 5 de xullo na Praza do Obradoiro. Participarán 28 delegacións —dez galegas e dezaoito portuguesas— e arredor de 2.400 deportistas, que competirán en disciplinas como baloncesto, balonmán, voleibol, natación e atletismo. Este último, xunto coa natación, incluirá tamén probas de deporte adaptado.
Pola súa banda, Pilar Lueiro subliñou que a cidade non acollía esta competición desde hai máis de dúas décadas e destacou que os xogos “son moito máis ca cifras”, ao representar unha oportunidade para promover valores como o respecto, a cooperación e o desenvolvemento persoal da mocidade. As competicións repartiranse por diferentes instalacións deportivas municipais, centros educativos e espazos da Universidade de Santiago.
No relativo á identidade visual, Thais Suárez explicou que o deseño aposta por unha imaxe que reflicte igualdade e diversidade, elementos centrais do evento. O logotipo integra o número da edición nunha figura entrelazada que simboliza as distintas disciplinas e a cooperación entre territorios. A cor violeta, segundo indicou, “responde á vontade de facer visible a igualdade de xénero”, mentres que o laranxa conecta coa identidade da área de Deportes municipal.
A proposta inclúe tamén o deseño de medallas e trofeos, nos que o símbolo se adapta a formatos tridimensionais, mantendo a coherencia visual do conxunto. O Concello avanzou ademais que nas próximas semanas se presentará o programa de voluntariado, orientado á participación da cidadanía, especialmente da mocidade.
