O catedrático da Universidade de Santiago de Compostela, Jesús López Romalde, vén de ser reelixido decano da Facultade de Bioloxía tras obter 43 votos a favor e catro en branco no proceso electoral celebrado no centro compostelán. O profesor continuará así á fronte da facultade nun novo mandato no que aposta por consolidar as liñas de traballo desenvolvidas nos últimos anos.
Entre as prioridades desta nova etapa sitúanse a mellora da calidade das titulacións, o reforzo da proxección internacional e a optimización dos procedementos administrativos, co obxectivo de facer máis áxil o funcionamento interno. Segundo explicou, estas accións buscan “mellorar a formación, a experiencia universitaria e as oportunidades do estudantado, eixo principal da actividade académica”.
O programa de López Romalde inclúe tamén medidas orientadas á dinamización da vida universitaria, como a organización de cursos de verán, exposicións e encontros abertos á cidadanía. Neste sentido, sinala que se pretende avanzar cara a unha facultade “máis viva, participativa e conectada coa sociedade”. O decano reelixido asegura que o seu propósito é “seguir construíndo un proxecto colectivo, baseado na proximidade, a escoita e a mellora continua”.
UNHA AMPLA TRAXECTORIA INVESTIGADORA E DE XESTIÓN
Jesús López Romalde é catedrático de Microbioloxía na USC e conta con máis de 35 anos de experiencia investigadora en ámbitos como a microbioloxía ambiental, a viroloxía ou a seguridade alimentaria e da auga. Ao longo da súa carreira, desenvolvida integramente na universidade compostelá, foi incorporando enfoques que integran a microbioloxía molecular, a epidemioloxía e a avaliación de riscos vinculados á sustentabilidade.
No ámbito da xestión académica, ocupou diferentes responsabilidades, entre elas as de secretario de departamento, director, vicerreitor e, desde 2022, decano da Facultade de Bioloxía. A súa actividade científica inclúe a autoría de máis de 280 artigos en publicacións especializadas, así como capítulos de libro e volumes editados, ademais de participación en numerosos proxectos de investigación nacionais e internacionais.
O seu traballo sitúao entre o 2% de científicos máis influentes do mundo segundo a Universidade de Stanford. Ademais, desenvolveu labores de transferencia de coñecemento cara ás administracións e ao sector produtivo, sendo autor de varias patentes no ámbito da acuicultura.
A súa traxectoria complétase coa organización de congresos científicos, participación en sociedades especializadas e o recoñecemento a través de diversos premios, entre eles a Medalla de Investigación ‘Ángeles Alvariño’ da Real Academia Galega de Ciencias.
