A concelleira Míriam Louzao respondeu ás críticas do Partido Popular sobre a situación da vivenda en Santiago defendendo que o Goberno municipal “leva traballando desde o minuto un do mandato cunha estratexia clara” neste ámbito.
Louzao cuestionou as declaracións do portavoz popular, Borja Verea, e sinalou que as competencias en materia de vivenda corresponden á Xunta de Galicia, á que instou a asumir o seu papel. “O señor Verea faría mellor en preocuparse polo que está facendo a Xunta”, indicou.
A edil puxo como exemplo datos recentes sobre a evolución dos prezos, asegurando que en Santiago o custo da vivenda medrou por debaixo doutros concellos galegos, tanto no mercado de compra como no de alugueiro. Segundo explicou, a cidade rexistrou un incremento do 3,10% no prezo por metro cadrado e do 8,5% no alugueiro, cifras inferiores ás doutros municipios.
Neste sentido, insistiu na necesidade de que a Xunta declare Santiago como zona de mercado residencial tensionado, unha medida que permitiría aplicar mecanismos de contención de prezos. “Seguimos agardando esa resolución”, afirmou.
Louzao destacou tamén varias actuacións impulsadas polo Concello, como a creación do Rexistro de Soares, a regulación das vivendas de uso turístico ou a posta á venda de parcelas municipais para promover nova construción residencial. Ademais, avanzou que o executivo local continúa traballando na creación dunha empresa municipal de vivenda.
A concelleira subliñou que o obxectivo é incrementar a oferta tanto de alugueiro como de compra, mediante a mobilización de solo e a colaboración con entidades privadas, ao tempo que criticou decisións adoptadas en anteriores mandatos, como a desaparición da empresa municipal de vivenda.
