O portavoz do Partido Popular en Santiago, Borja Verea, centrouse esta mañá na situación da vivenda na cidade, que cualificou como “o principal problema” para mozos e familias, ao tempo que criticou a xestión do executivo municipal encabezado por Goretti Sanmartín.
Segundo expuxo, o goberno local leva tres anos sen desenvolver medidas efectivas neste ámbito, asegurando que “nin se construíu unha soa vivenda pública nin se puxo en marcha ningún alugueiro público municipal”. Verea sostivo que a política de vivenda do executivo se basea na “inacción, sen planificación nin medidas concretas”, e reduciu a súa actuación á proposta de declaración de zona tensionada.
O dirixente popular afirmou que esta figura non resolve o problema e puxo como exemplo outras cidades. Indicou que, segundo os seus datos, na cidade da Coruña o número de vivendas en alugueiro reduciuse significativamente tras a súa aplicación, ao pasar de máis de setecentas a pouco máis de trescentas nun período de meses, o que atribuíu á retirada de inmobles do mercado por parte dos propietarios.
Verea tamén cuestionou o uso do solo municipal, acusando ao goberno de “mercantilizar o solo público” mediante a súa venda ao sector privado. Segundo sinalou, esta política tería como consecuencia un incremento dos prezos das vivendas. En contraposición, defendeu a cesión de terreos á Xunta de Galicia para a construción de vivenda pública, asegurando que este modelo permitiría reducir custos para a cidadanía.
Neste sentido, comparou dous escenarios: mentres que un piso de arredor de 80 metros cadrados podería acadar, segundo indicou, un prezo de 180.000 euros no modelo actual, situaríase en torno aos 100.000 euros baixo un sistema de promoción pública autonómica.
O portavoz popular tamén fixo referencia ao rexistro de soares municipais, do que destacou que “o resultado é unha única vivenda expropiada”, sen que se teñan producido avances noutros proxectos anunciados, como o das vivendas en Mazarelos.
PROPOSTA DO PP
Durante a súa intervención, Verea presentou varias propostas en materia de vivenda, entre as que destacou a creación dun banco público de alugueiro, no que o Concello actuaría como intermediario entre propietarios e inquilinos con rendas sociais. Tamén mencionou a necesidade de impulsar vivendas específicas para persoas maiores con servizos compartidos, permitir o uso residencial de baixos en zonas como Conxo e Santa Marta, e activar unha empresa pública de vivenda.
Outras medidas inclúen bonificacións fiscais como a do IBI, a modificación do Plan Xeral de Ordenación Municipal para facilitar a construción e a cesión de parcelas públicas á administración autonómica para promocións de vivenda protexida.
SITUACIÓN POLÍTICA MUNICIPAL
Preguntado pola posibilidade dunha moción de censura, Verea sinalou que non percibe ese escenario na actualidade. Lembrou contactos previos con concelleiros non adscritos e afirmou que, tras o debate recente sobre a cuestión de confianza, considera que as forzas da oposición optaron por manter o actual goberno.
