O portavoz do Partido Popular en Santiago, Borja Verea, denunciou este venres a situación na que se atopa o servizo da Policía Nacional na cidade tras o incendio da comisaría, cualificando de “inaceptable” a solución provisional habilitada na praza do Obradoiro.
Segundo explicou, a atención á cidadanía está a realizarse “a intemperie, en dúas furgonetas”, unha situación que, ao seu xuízo, se está prolongando máis do previsto sen que se adopten alternativas. “Non é normal esta solución provisional que se está alongando”, afirmou.
O líder popular puxo o foco nas condicións tanto do persoal policial como das persoas usuarias do servizo. Indicou que, independentemente das condicións meteorolóxicas, “os cidadáns esperan a intemperie e a Policía está encaixoada en dúas furgonetas que non están deseñadas para traballos así de longa duración”.
Neste sentido, achegou datos sobre o volume de atención rexistrado nas últimas semanas, sinalando que “oito mil cidadáns” acudiron a este dispositivo provisional para realizar trámites como a renovación do DNI ou do pasaporte. Engadiu que outras “catro mil persoas” foron atendidas en espazos complementarios, que describiu como reducidos e sen condicións axeitadas.
Verea tamén cuestionou a falta de privacidade nestas atencións e afirmou que “non hai as mínimas condicións de intimidade” para a realización de determinados trámites.
Ademais, criticou a actuación do Goberno municipal e da alcaldesa, Goretti Sanmartín, á que acusou de non atender as demandas dos profesionais. Segundo indicou, os traballadores da Policía Nacional solicitaron unha reunión “hai dúas semanas” sen obter resposta. “Nin sequera tivo un minuto para atender aos traballadores”, asegurou.
O portavoz popular insistiu en que existen “decenas de alternativas moito máis dignas” para resolver a situación provisional e reclamou unha maior implicación tanto do Concello como do Ministerio do Interior para habilitar un espazo adecuado mentres non se restablece o servizo na comisaría.
CRÍTICAS Á INSTALACIÓN DUNHA ESTATUA DE MONCHO REBOIRAS
Na mesma comparecencia, Verea referiuse á instalación dunha estatua de Moncho Reboiras na Carreira do Conde, prevista para os próximos días. O portavoz popular considerou que esta decisión “rompe o consenso” sobre o uso do espazo público e responde a unha iniciativa de carácter ideolóxico.
Segundo indicou, o seu grupo cuestiona tanto a elección da figura homenaxeada como o procedemento seguido, e asegurou que se trata dunha actuación que “non responde ao interese xeral da cidade”. Tamén puxo en dúbida a vinculación de Reboiras con Santiago, ao afirmar que “non ten ningunha vinculación con Santiago de Compostela”.
