A concelleira do Grupo Municipal Socialista en Santiago, Marta Abal, denunciou a situación de “parálise e falta de transparencia” na xestión dos aparcadoiros da Praza de Galicia e da Praza de Vigo, ao considerar que o Goberno municipal non avanzou na definición dun modelo tras o remate das concesións.
Segundo explicou, a comisión de estudo creada o 25 de abril de 2025 para analizar alternativas de xestión non volveu reunirse desde a súa constitución, malia que o seu regulamento establecía encontros trimestrais. “Non se volveu reunir nin unha soa vez”, sinalou, lembrando que deberían terse celebrado sesións en xullo e outubro de 2025 e en xaneiro de 2026.
A edil socialista criticou tamén a falta de información sobre a contratación dunha consultaría externa, destinada a avaliar opcións de xestión. “O Goberno municipal non deu conta das empresas ás que solicitou orzamento nin das seleccionadas”, indicou, ao tempo que advertiu de que tampouco se fixeron públicos os resultados dun contrato menor formalizado en xuño de 2025 cun prazo de execución de dous meses.
Neste contexto, Abal cualificou a situación de “crítica e alarmante”, tendo en conta que a concesión do aparcadoiro da Praza de Galicia xa finalizou en xullo de 2025 e que a da Praza de Vigo rematará en outubro deste ano, sen que exista unha proposta definida para a súa xestión.
A concelleira puxo tamén o foco nas previsións económicas recollidas no proxecto de orzamentos municipais, que estiman uns 700.000 euros de ingresos vinculados a estes aparcadoiros. “Son previsións que non teñen respaldo real”, afirmou, ao considerar que non se especifica cando comezarían a xerarse nin se contemplan os custos asociados ao servizo. Neste sentido, lembrou que o propio informe económico-financeiro xa cuestiona estas estimacións.
Ademais, indicou que o orzamento non recolle gastos de persoal, mantemento nin investimentos, nin tampouco contempla o escenario de que a xestión poida recaer na empresa pública Tussa. “Non hai modelo de xestión definido, pero si ingresos previstos”, resumiu.
En relación coa Praza de Vigo, Abal advertiu de que a súa situación é “especialmente preocupante”, destacando que se trata dun dos aparcadoiros con prezos máis elevados da cidade, especialmente en estancias curtas, malia o seu emprazamento no Ensanche. A concelleira subliñou o seu potencial para “apoiar e dinamizar o comercio da zona”, e alertou do risco de que poida derivar nunha situación semellante á da Praza de Galicia.
Por todo isto, o Grupo Municipal Socialista reclamou a convocatoria urxente da comisión de estudo para que o Goberno municipal informe dos avances realizados, presente os resultados dos estudos encargados e defina un modelo de xestión.
“Estamos ante unha oportunidade clave para mellorar un servizo importante para a cidade e para dinamizar o comercio, pero o que hai hoxe é falta de planificación, de transparencia e de decisións”, concluíu Abal.
