O Goberno municipal de Santiago reafirma o seu compromiso co ‘Pacto polo rural’, un documento subscrito por todas as forzas políticas e vixente até o ano 2030. Así o defendeu a concelleira de Medio Rural, Pilar Lueiro, quen asegurou que o executivo local está a “superar o pactado” tanto en investimento como en desenvolvemento de actuacións.
Segundo explicou, nos últimos anos ampliáronse servizos, reforzouse a información e participación veciñal e incrementouse o mantemento das infraestruturas. Lueiro sinalou que o déficit histórico de servizos no rural compostelán está a ser corrixido progresivamente, a pesar da dispersión territorial que caracteriza o municipio e que, segundo indicou, obriga a realizar un esforzo inversor superior ao da zona urbana.
Neste sentido, destacou que o investimento por habitante no rural é superior ao urbano, cunha concentración de recursos destinada a mellorar infraestruturas básicas. No exercicio 2025, a Concellería de Medio Rural executou directamente o 1,75% do orzamento municipal e comprometeu un gasto próximo aos cinco millóns de euros.
A responsable municipal tamén subliñou que a actuación do Goberno se basea nunha estratexia de prioridades, centrada en obras que beneficien ao maior número de veciños e veciñas. Entre os exemplos, citou os proxectos de abastecemento en Aradas e Asa Bugueira, destinados a mellorar a presión da rede e ampliar o servizo a novas zonas.
Lueiro fixo referencia tamén a avances en materia urbanística e de servizos, como a modificación das condicións para a construción de vivendas en determinados núcleos ou o arranxo de escolas con servizo de comedor, que se ampliará co programa de madrugadores no vindeiro curso. Ademais, destacou o compromiso de implantar un transporte rural, unha demanda histórica que, segundo afirmou, “nunca existiu” ata agora.
A concelleira incidiu en que o rural constitúe un dos eixos da acción do Goberno local e reivindicou este ámbito como un espazo que “compre poñer en valor con orgullo”. “Este Goberno vai cumprir”, afirmou, reiterando a vixencia do pacto até 2030.
OS SOCIALISTAS DENUNCIAN “FALTA DE AVANCES”
Pola súa banda, desde o Grupo Municipal Socialista, a concelleira Marta Abal ofreceu unha valoración crítica da situación e denunciou a “falta de avances no cumprimento do Pacto polo rural” máis de tres anos despois da súa aprobación. Segundo indicou, esta situación evidencia “unha clara falta de compromiso do Goberno municipal co rural de Santiago”.
Abal apoiou as súas críticas nas valoracións da Federación de Asociacións Veciñais do Rural (FERUSA), que, segundo afirmou, sinala que “non houbo avances reais” na execución dos compromisos adquiridos. A edil socialista puxo o foco na situación dos servizos básicos e advertiu de que “só 70 dos 215 núcleos rurais contan con saneamento e abastecemento”, o que cualificou como unha “desigualdade inaceptable”.
Neste contexto, o grupo socialista reclamou un cambio de rumbo na política municipal, cunha planificación concreta e prazos definidos. “Sen feitos nin prazos, o Pacto polo rural queda nunha declaración de intencións sen efectos reais”, afirmou Abal, quen insistiu na necesidade de garantir igualdade de oportunidades para a veciñanza do rural en ámbitos como a mobilidade, os servizos e o desenvolvemento económico.
