A concelleira do Partido Popular en Santiago, María Baleato, compareceu este martes en rolda de prensa para facer unha valoración da situación turística na cidade, centrando as súas críticas na actuación do goberno local nos últimos anos. Durante a súa intervención, a edil afirmou que o executivo municipal xerou unha percepción negativa arredor do turismo desde a súa chegada ao poder en 2023.
Segundo explicou, desde o inicio do mandato se trasladou a idea de que o turismo supuña un problema para a cidade, mencionando cuestións como a masificación ou determinados comportamentos incívicos. Neste sentido, Baleato sinalou que “foi este goberno o que puxo no punto de mira aos turistas” e engadiu que esta postura tivo consecuencias na imaxe de Santiago como destino.
A concelleira sostivo que a situación actual non responde a unha problemática xeral do sector turístico, senón a un contexto específico da cidade, e cuestionou os resultados das políticas impulsadas polo executivo municipal nesta materia. Ademais, criticou a falta de planificación e de medidas concretas ao longo dos últimos tres anos.
CHAMAMENTO A REFORZAR A ESTRATEXIA TURÍSTICA
Baleato coincidiu coas demandas expresadas polo sector hoteleiro e defendeu a necesidade de impulsar a promoción turística, especialmente nos períodos de menor afluencia. Tamén fixo referencia á preparación do Xacobeo 2027, para o que pediu unha maior coordinación institucional e unha planificación anticipada.
A concelleira destacou que Santiago conta con recursos como o patrimonio cultural e relixioso, a oferta hoteleira, espazos como o Palacio de Congresos ou a Cidade da Cultura, así como a gastronomía, que poden contribuír a consolidar o destino. Non obstante, advertiu dunha posible perda de competitividade se non se adoptan medidas.
CRÍTICAS Á XESTIÓN E Á INFORMACIÓN INSTITUCIONAL
Durante a rolda de prensa, a representante popular tamén cuestionou a xestión municipal en materia de transparencia, facendo referencia ás dificultades para acceder a datos relacionados con investimentos turísticos. Indicou que solicitaron información sobre partidas destinadas a acordos con compañías aéreas e que esta foi facilitada “con limitacións”.
Ademais, evitou entrar na polémica entre responsables institucionais no ámbito turístico, ao considerar que ese debate non responde á situación real do sector na cidade.
En resposta ás preguntas dos medios, Baleato abordou tamén cuestións relacionadas coa coordinación aeroportuaria, apuntando que as competencias corresponden ao Estado, aínda que considerou necesaria a colaboración entre administracións.
Finalmente, a edil referiuse á situación do rural compostelán, que cualificou como “lamentable”, e criticou a falta dunha planificación integral en ámbitos como o transporte público, a limpeza, o alumeado ou o estado das vías. Segundo afirmou, existen actuacións puntuais, pero non un proxecto global de mellora.
