O pleno municipal de Santiago deu luz verde á moción presentada polo Grupo Municipal Socialista para mellorar o estado das instalacións do campo de fútbol da Merced, situado no barrio de Conxo. A iniciativa foi defendida pola concelleira socialista Marta Abal, quen puxo o foco na necesidade de actuar nun espazo que cualificou como fundamental para o deporte base na cidade.
Durante a súa intervención, Abal sinalou que o campo é utilizado a diario por un elevado número de nenos e nenas, mais advertiu de que as condicións actuais non son as adecuadas para o seu uso continuado. Neste sentido, denunciou a existencia de diversas deficiencias nas instalacións, entre elas problemas nos vestiarios, carencias nas condicións xerais, incidencias no sistema de iluminación e un estado deteriorado do terreo de xogo.
A concelleira socialista alertou tamén de que esta situación pode chegar a supoñer un risco para as persoas usuarias, especialmente debido á intensidade de uso do equipamento. Segundo explicou, non se trata de incidencias puntuais, senón dunha problemática derivada dunha “falta de mantemento continuada no tempo”.
A proposta aprobada reclama ao Goberno municipal que leve a cabo actuacións inmediatas para resolver as deficiencias máis urxentes e que, ao mesmo tempo, impulse un plan de renovación integral das instalacións. “Porque apostar polo deporte base non é só dicilo, é garantir que os rapaces e rapazas teñan espazos seguros e dignos onde practicar deporte”, afirmou Abal.
Finalmente, desde o Grupo Municipal Socialista indicaron que realizarán un seguimento do cumprimento desta iniciativa co obxectivo de que as melloras propostas se materialicen en actuacións concretas e non queden nun compromiso sen executar.
