O concelleiro do Partido Popular de Santiago, José Ramón de la Fuente, denunciou a situación da rede de centros socioculturais do municipio, asegurando que a súa xestión actual está a afectar tanto aos equipamentos urbanos como aos situados no rural. Segundo indicou, esta situación estaría a provocar a paralización de actividades promovidas polo propio Concello e a limitación do uso destes espazos por parte da veciñanza.
O edil puxo o foco no caso do centro sociocultural de Villestro, que, segundo explicou, leva “case ano e medio pechado”, sen previsión clara de reapertura. De la Fuente sinalou que os veciños non poden empregar estas instalacións nin para reunións nin para actividades comunitarias desde o inicio dunhas obras que, afirmou, acumulan atrasos e interrupcións.
De acordo coa información trasladada polo grupo popular, os traballos previstos neste centro —incluídos no Plan provincial de cooperación ás obras e servizos municipais— deberían ter comezado en novembro de 2024, mais iniciáronse a finais de xaneiro de 2025 e foron suspendidos en febreiro dese mesmo ano. “Non só comezaron con case tres meses de retraso, senón que foron paralizadas sen explicación algunha”, afirmou o concelleiro.
Antes do inicio das obras, o edificio presentaba diferentes deficiencias estruturais, entre elas infiltracións de auga, problemas de illamento térmico, fugas no pozo do ascensor e dificultades no acceso exterior en días de chuvia. Estas intervencións tiñan como prazo de execución febreiro de 2025.
Segundo indicou De la Fuente, o peche do centro está a ter un impacto directo na vida da parroquia, ao tratarse dun espazo utilizado para reunións veciñais e actividades dirixidas a distintos colectivos, como programas de lecer, obradoiros de memoria para persoas maiores ou propostas para a infancia.
O Partido Popular de Santiago solicitou ao goberno local que adopte medidas para rematar as obras e reabrir o centro, e que, mentres isto non sexa posible, habilite un espazo alternativo na parroquia para manter a actividade comunitaria.
Finalmente, o concelleiro sinalou que “os barrios e parroquias necesitan servizos e espazos públicos activos, non instalacións pechadas durante meses por mala xestión, desidia administrativa ou inacción política”, incidindo na necesidade de garantir o funcionamento destes equipamentos municipais.
