As concelleiras non adscritas do Concello de Santiago, a través de Mercedes Rosón, defenderon publicamente o seu voto favorable na cuestión de confianza á que se someteu a alcaldesa, Goretti Sanmartín, e cuestionaron a postura mantida polo PSOE local durante o proceso.
Rosón sinalou que o Partido Socialista debería “poñerse de acordo” na súa valoración sobre a decisión adoptada polas edís, ao considerar que existen mensaxes contraditorias dentro da propia formación. Neste sentido, indicou que mentres o alcalde socialista de Ames, Blas García, “felicitou” a decisión, desde Santiago producíronse críticas por parte do deputado Aitor Bouza.
A concelleira non adscrita afirmou que Bouza amosou “descoñecemento sobre asuntos municipais”, ao tempo que diferenciou entre a aprobación dun orzamento e unha cuestión de confianza. Segundo explicou, o voto favorable non implica apoiar as contas municipais, coas que recoñece discrepancias, senón evitar unha situación de bloqueo institucional.
“Non estabamos dispostas a facer perder o tempo á cidadanía cun mes no que non se ía promover un cambio de goberno”, indicou, ao tempo que resumiu a decisión como unha elección entre “enredar ou ir de cara”.
Rosón subliñou que a abstención do PSOE non permitía desbloquear a situación, mentres que o apoio das concelleiras non adscritas resultou determinante fronte aos votos en contra do Partido Popular. “Fomos conscientes de que a abstención non chegaba e votamos a favor”, explicou.
Na súa intervención, tamén asegurou que a votación da cuestión de confianza supuña “pechar a porta a unha moción de censura” durante o prazo dun mes que establece a normativa. Neste contexto, cuestionou a estratexia dos socialistas ao manterse na abstención e preguntouse se existía vontade de promover un cambio de goberno.
Ademais, Rosón rexeitou as insinuacións sobre posibles negociacións ocultas, defendendo que a decisión se tomou “con liberdade e responsabilidade”. “Outras non vivimos da política e podemos votar con coherencia e altura de miras”, afirmou.
Finalmente, criticou a actuación do PSOE compostelán, ao que acusou de manter unha postura incoherente ao longo do proceso e de non contribuír á resolución da situación institucional no Concello.
