A Plataforma Stop Planta de Residuos-Cacheiras, integrada por veciños e veciñas do municipio de Teo, manifestou o seu rexeitamento á actuación do goberno local ante o proxecto dunha planta de tratamento de residuos da construción e demolición prevista nunha zona próxima a vivendas unifamiliares.
O colectivo veciñal censura a “pasividade” do Concello, gobernado polo PP, despois de que este recoñecese recentemente que aínda non foi emitido o informe de viabilidade urbanística solicitado pola Consellería de Medio Ambiente. Segundo a plataforma, esta situación “non é neutralidade, é pasividade”, ao considerar que o executivo Consellería de Melocal tivo a oportunidade de posicionarse sobre aspectos como a idoneidade da parcela ou os accesos.
A protesta veciñal coincide coa convocatoria dunha concentración prevista para a tarde deste mércores, en paralelo á celebración do pleno municipal, co obxectivo de amosar o seu desacordo coa posible instalación da planta entre as aldeas de Feros e A Torre.
Pola súa banda, o goberno municipal encabezado por Lucía Calvo da Uz sinalou nun comunicado que a autorización deste tipo de infraestruturas corresponde á Administración autonómica, polo que non entra dentro das competencias directas do Concello. Fronte a esta posición, a plataforma considera que a administración local “optou por non exercer un papel activo de información, contraste e defensa da poboación afectada”.
En relación coa finalidade da planta, desde o Concello apuntouse que permitiría “pechar o ciclo de vida útil dos materiais da construción” e contribuír á redución de emisións e residuos contaminantes. Porén, os veciños replican que presentar a instalación como un punto limpo “é unha forma de restar importancia ao que realmente se pretende implantar”.
A plataforma incide en que o principal conflito reside na localización da actividade nunha contorna rural con vivendas próximas, advertindo de posibles afeccións como ruído, emisión de po, incremento do tráfico pesado e impacto visual. Neste sentido, reclaman unha maior implicación municipal e cuestionan que o Concello “non pode esconderse detrás da Xunta e, ao mesmo tempo, saír publicamente a defender o proxecto”.
