O Equipo Territorial de Policía Xudicial (ETPJ) da Garda Civil de Santiago de Compostela en colaboración coa Garda Civil do Posto Principal de Milladoiro – Ames detivo a dúas persoas como presuntos autores de varios delitos de roubo.
Tal e como recollen nun comunicado, a investigación, tutelada polo Tribunal de Instancia, Sección de Instrución, Praza nº2 de Santiago de Compostela, iniciouse por mor da comisión de varios roubos con forza en vivendas o pasado mes de decembro.
No transcurso da mesma, os axentes pescudaron que os mesmos eran realizados por membros dun grupo criminal fincado en Cataluña, desde onde se desprazaban a distintos puntos da xeografía nacional, permanecendo no lugar varias semanas para a comisión dos ilícitos.
Explican que o modus operandi consistía en trasladarse a zonas residenciais próximas a cidades ou pobos durante o día, para localizar posibles obxectivos. Unha vez seleccionados, realizaban un estudo dos accesos e posibles vías de escape.
Posteriormente, normalmente á noitiña, desprazábanse no vehículo ata unha zona próxima, permanecendo o condutor no seu interior en labores de vixilancia mentres o resto do grupo, unha vez comprobado que no seu interior non se atopaban os moradores, accedía á vivenda, rexistrando as habitacións principais en busca de xoias e diñeiro en efectivo preferentemente.
Tras conseguir o seu obxectivo, regresaban ao vehículo e trasladábanse a outro domicilio, en ocasións nas proximidades do anterior, chegando a realizar dous ou tres roubos en poucas horas.
A Garda Civil, ademais da identifación e detención de dúas dos compoñentes do grupo, logrou a recuperación de gran cantidade das xoias subtraídas. Investígaselles como presuntos autores de delitos de roubo con forza e outro de pertenza a grupo criminal.
Os detidos, xunto coas actuacións, foron postos a disposición do mencionado Tribunal, decretando a Autoridade Xudicial o seu ingreso en Centro Penal. As xoias recuperadas foron restituídas aos seus lexítimos propietarios, quedando aínda gran cantidade delas sen entregar. A investigación continúa aberta e non se descartan máis detencións.
