O grupo galego The Rapants confirmou que máis de 5.500 persoas asistirán este domingo, 29 de marzo, ao Multiusos Fontes do Sar, en Santiago, para escoitar por primeira vez en directo o seu novo disco, ‘Rapants club’. Segundo explicou a banda nun comunicado, o concerto apunta a converterse nunha das grandes citas musicais da tempada e nunha noite que o propio grupo define como “un fito xeneracional para a música en galego”. A expectación arredor da estrea do novo traballo foi tal que a organización decidiu ampliar o aforamento despois de que as entradas iniciais se esgotasen nos primeiros días de venda.
Na actualidade, segundo trasladan os Rapants, só quedan 400 entradas dispoñibles, o que consolida a dimensión dun evento que apunta a un cheo histórico para a banda. O recinto abrirá as súas portas ás 19.00 horas e o concerto principal comezará ás 19.45, nunha noite que contará tamén coa actuación de Ulex como grupo convidado. A banda compostelá exercerá de teloneira e é presentada polos propios Rapants como unha formación “chamada a triunfar nos próximos anos”. A actuación en Sar servirá para presentar ao público ‘Rapants club’, o novo álbum do grupo, producido por Anxo Ferreira, Raúl Pérez e Miguel León. Segundo recolle o comunicado difundido pola formación, o disco constrúese como “unha mestura de estilos musicais e enerxías canalizadas desde a máis sincera”.
O concerto conta ademais co apoio do Concello de Santiago, nunha cita que reforza o momento de expansión que vive a banda e que evidencia tamén o tirón actual da música feita en galego, capaz de mobilizar milleiros de persoas arredor dun lanzamento discográfico. Con esta presentación en Sar, The Rapants non só porán en escena un novo traballo, senón que buscarán converter a noite do 29 de marzo nunha demostración de forza xeracional e de conexión co público, nun dos maiores escaparates que tiveron ata agora.
