A Policía Nacional interveu un total de 250 doses de cocaína e unha cantidade “algo menor” de haxix no operativo contra o tráfico de drogas que efectuou o pasado venres en dous pisos de Santiago e que se saldou con catro detidos, que seguen investigados a pesar de quedar en liberdade. Segundo informaron fontes policiais, un dos inmobles atópase na rúa de Alfredo Brañas, no Ensanche compostelán, e o outro está situado no barrio de Vista Alegre. O primeiro deles funcionaba como punto de venda e consumo, mentres que o segundo unicamente operaba para a venda de estupefacientes. Ademais das sustancias, os axentes tamén incautaron 2.000 euros en moeda fraccionada, unha báscula para pesar as doses, dous coitelos de monte, un machete, un fusil simulado e unha escopeta de perdigóns.
Esta información transcendeu despois de que a xuíza titular do Xulgado de Instrución número 3 de Santiago levantase o segredo das actuacións decretado inicialmente. Na mañá do sábado, as catro persoas detidas pasaron a disposición xudicial e foron postas en liberdade. Con todo, seguen investigadas por un delito de tráfico de drogas, de usurpación de bens inmobles e de tenencia ilícita de armas. Ademais, a maxistrada impuxo a obrigación do desaloxo inmediato das vivendas ocupadas, poñendo fin á actividade ilícita que se desenvolvía nestes puntos da cidade.
