O Xulgado de Instrución número 3 de Santiago de Compostela decretou a posta en liberdade das catro persoas detidas este venres no marco dun operativo policial contra o tráfico de drogas no barrio do Ensanche, aínda que todas elas continúan investigadas por este delito, así como por usurpación de bens inmobles e tenencia ilícita de armas.
As persoas arrestadas pasaron na mañá deste sábado a disposición xudicial, momento no que se lles comunicou a decisión. Segundo indicaron fontes do Tribunal Superior de Xustiza de Galicia, a resolución inclúe tamén a obriga de desaloxo inmediato das vivendas ocupadas nas que, supostamente, se desenvolvía a actividade delituosa.
A intervención centrouse en varios inmobles situados no Ensanche compostelán, que, segundo a investigación, estarían a funcionar como puntos de venda de droga. O operativo foi desenvolvido pola Policía Nacional tras recibir unha serie de denuncias veciñais que alertaban da existencia de narcopisos nesta zona da cidade.
Nun primeiro momento, fontes policiais apuntaran a que se podían ter practicado entre catro e cinco detencións. Porén, posteriormente, fontes xudiciais confirmaron que foron finalmente catro as persoas detidas, as mesmas que compareceron este sábado ante o xulgado.
O caso continúa agora en fase de instrución e o xulgado acordou ademais o segredo das actuacións, polo que polo momento non transcenderon máis detalles sobre o alcance da investigación nin sobre o material intervido durante o operativo. A actuación xudicial e policial prodúcese despois das queixas trasladadas por residentes da contorna, que viñan advertindo da situación en varias vivendas da zona.
