A coordinadora de UCIN Galicia denunciou o estado de conservación de diversos Bens de Interese Cultural (BIC) na comunidade, entre eles o Castelo da Rocha Forte, situado en Santiago de Compostela, ao que sinala como exemplo da falta de mantemento continuado destes espazos tras as actuacións de recuperación.
O coordinador da formación, José Luis Calo, criticou que, unha vez realizados investimentos públicos en escavacións e posta en valor, “resulta incoprensible que se destinen fondos públicos a la recuperación de enclaves históricos para después dejarlos prácticamente abandonados, sin un plan real de mantenimiento, vigilancia o puesta en valor”.
Segundo UCIN, esta situación está a provocar un deterioro progresivo das estruturas arqueolóxicas e do seu contorno, o que consideran un problema tanto desde o punto de vista patrimonial como do aproveitamento social destes espazos.
O Castelo da Rocha Forte, unha fortaleza medieval de relevancia na historia galega e destruída durante a revolta irmandiña no século XV, foi obxecto de diversas campañas arqueolóxicas nas últimas décadas. Porén, a formación asegura que os restos descubertos non contan cunha conservación continuada nin co coidado propio dun BIC.
Neste contexto, UCIN sostén que a falta de mantemento supón tamén unha perda de oportunidades no ámbito cultural, educativo e turístico, ao non se desenvolver plenamente o potencial destes enclaves.
A organización anunciou o inicio dunha campaña de denuncia e sensibilización en toda Galicia, coa que pretende trasladar ás administracións públicas a necesidade de adoptar medidas concretas para a protección do patrimonio. “Galicia posee uno de los patrimonios históricos más ricos de Europa y no podemos permitir que espacios únicos acaben deteriorándose por falta de mantenimiento o gestión”, afirmou Calo.
Entre as propostas, UCIN reclama a posta en marcha dun plan autonómico de conservación permanente para os BIC, que inclúa tarefas periódicas de mantemento, melloras na sinalización, accións de difusión cultural e mecanismos de protección efectivos.
