A concelleira non adscrita do Concello de Santiago, Milagros Castro, rexistrou unha proposición para o seu debate no Pleno municipal coa que reclama que sexa este órgano o que determine a forma de xestión do servizo relativo ao ciclo integral da auga.
A iniciativa parte da referencia a acordos plenarios anteriores, en concreto unha moción aprobada en xaneiro de 2022 polos grupos municipais do PP, Compostela Aberta e BNG. Segundo recolle o texto presentado, aquel acordo establecía que corresponde ao Pleno decidir o modelo de xestión dos servizos municipais, de acordo coa lexislación vixente.
Na proposición, Castro lembra que nese momento se sinalaba que a opción dunha xestión indirecta do servizo non debía considerarse inmutable, e que, unha vez rematado o contrato en vigor, o Pleno podía volver avaliar e decidir o modelo máis axeitado. O documento indicaba tamén que só no caso de optar novamente por unha fórmula indirecta podería a Xunta de Goberno Local desenvolver as súas competencias para a súa tramitación.
ACORDOS PREVIOS E DEBATE RECENTE
A concelleira tamén fai referencia a outro acordo adoptado en novembro de 2018, relativo á creación dunha comisión encargada de estudar a forma máis sustentable e eficiente de xestionar o servizo da auga. Esa proposta foi elevada ao Pleno o pasado 26 de febreiro de 2026, mais non prosperou tras un empate na votación, con seis votos en contra do goberno local, seis a favor e a abstención do Partido Popular.
Segundo expón a edil, as intencións manifestadas polo executivo municipal de avanzar na licitación do servizo sen someter previamente a decisión ao Pleno poderían supoñer, ao seu xuízo, un incumprimento dos acordos adoptados en 2018 e 2022, que foron subscritos polas formacións que actualmente integran o goberno local.
PROPOSTA DE ACORDO AO PLENO
A proposición presentada inclúe dous puntos principais. En primeiro lugar, solicita que o Pleno exprese novamente a súa vontade de ser o órgano encargado de determinar a forma de xestión do servizo, co obxectivo de evitar posibles inseguridades xurídicas nun futuro proceso de licitación.
En segundo lugar, insta á Xunta de Goberno Local a non aprobar o procedemento de contratación ata que o Pleno adopte unha decisión sobre o modelo de xestión, reclamando que esta determinación se produza “coa maior urxencia posible”.
