O presidente da Deputación da Coruña, Valentín González Formoso, e a alcaldesa de Santiago de Compostela, Goretti Sanmartín, formalizaron este venres no Pazo de Raxoi un amplo paquete de acordos. “Esta colaboración tradúcese nunha importante inxección económica destinada á cohesión social e cultural, destacando a concesión dunha subvención nominativa de 140.042,13 euros para cofinanciar o sostemento do Centro Sociocultural e Xuvenil do Ensanche, cuxo orzamento total para este exercicio ascende a 226.821,76 euros“, informa o organismo provincial.
De maneira complementaria, a Deputación achega outros 75.000 euros para garantir o funcionamento dos centros socioculturais situados no ámbito rural compostelán, apoiando así un proxecto que conta cun investimento global de 150.000 euros. No ámbito da promoción cultural, ambas as administracións selaron tamén o convenio para o desenvolvemento do Festival Rosalía 2026 por valor de 12.100 euros.
TRASPASO DE VIAS
A xornada de traballo tamén serviu para oficializar o traspaso de titularidade de varias vías provinciais que, tras o acordo adoptado hoxe, pasan a ser xestionadas directamente polo Concello de Santiago.
Entre os tramos transferidos atópase a estrada DP-7801 de San Lourenzo a Vidán, nun tramo de 1.269 metros, xunto co seu correspondente variante duns 285 metros de longo. Así mesmo, o Concello asume a titularidade doutro tramo da DP-7805, que dá acceso ao Hospital Provincial e conta con 545 metros, e da DP-7806, a coñecida costa ao Avío, que suma outros 273 metros de percorrido. Esta entrega de actas permite que o goberno local teña plena autonomía sobre estas zonas, facilitando futuras actuacións de mantemento e ordenación urbana nunha rede viaria que, pola súa funcionalidade, ten xa un carácter marcadamente municipal.
