A concelleira do Grupo Municipal Socialista de Santiago Marta Abal denunciou o que cualificou como un “deixamento” do Goberno local no coidado do patrimonio escultórico da cidade e reclamou que se adopten medidas urxentes para garantir a súa conservación e posta en valor.
Segundo explicou o PSdeG nun comunicado, Abal sinalou como exemplo desta situación o conxunto escultórico de Leopoldo Nóvoa situado en Bonaval, que —segundo indicou— permanece desde hai tempo con pintadas e sen que se acometese a súa limpeza. A edil socialista considerou que esta situación é “impropia dunha cidade que presume de patrimonio e de cultura” e criticou que o Executivo municipal non adoptase medidas para a súa recuperación.
A concelleira advertiu ademais de que non se trata dun caso illado, e lembrou que o seu grupo xa denunciara anteriormente o estado doutra obra do espazo público compostelán, a escultura ‘Maternidade’, de Buciños. Segundo indicou, esta peza non foi reposta ata febreiro deste ano despois de reiteradas reclamacións por parte da oposición.
Neste sentido, Abal sostivo que estes episodios evidencian “un patrón preocupante de abandono, deixamento e ausencia de actuación” respecto de elementos que forman parte da memoria urbana e do patrimonio artístico de Santiago de Compostela.
Ante esta situación, o Grupo Municipal Socialista anunciou que formulará unha iniciativa no próximo pleno municipal para reclamar a restauración inmediata do conxunto escultórico de Leopoldo Nóvoa en Bonaval. Ademais, solicitará ao Goberno local un compromiso efectivo co mantemento, conservación e posta en valor das esculturas públicas da cidade, co obxectivo de evitar que se repitan episodios semellantes no futuro.
