A Universidade de Santiago de Compostela leva 531 anos sendo unha das institucións máis determinantes no desenvolvemento intelectual, social e económico de Galicia. De feito, non é só un espazo académico de formación e investigación, senón tamén unha institución que modela cidades, crea oportunidades e proxecta o país cara ao mundo. Nin en Santiago nin en Lugo a USC é só un elemento máis da paisaxe urbana; é unha parte esencial da identidade de cada cidade e da súa capacidade de mirar ao futuro.
Por iso, estas eleccións á Reitoría non son un simple proceso interno. O que está en xogo é o modelo de universidade que queremos construír para as vindeiras décadas e, en boa medida, o papel que debe desempeñar no progreso do conxunto de Galicia.
A miña visión é clara: a USC debe ser unha universidade ambiciosa, na investigación, na docencia e tamén na súa relación coa sociedade.
Nun contexto global marcado pola revolución tecnolóxica, a intelixencia artificial e transformacións económicas e sociais cada vez máis rápidas, a universidade non pode limitarse a observar os cambios, senón que ten que lideralos. Iso significa apostar pola dixitalización, por atraer e reter talento investigador, por reforzar a internacionalización e por adaptar o mapa de titulacións ás necesidades do futuro.
Pero unha universidade excelente non se constrúe só con grandes ideas. Constrúese tamén co compromiso e co traballodiario das persoas que a fan posible: o profesorado, o persoal investigador, o persoal de xestión, administración e servizos e, por suposto, o estudantado. Garantir condicións laborais dignas, estabilidade e oportunidades de desenvolvemento profesional é unha condición indispensable para fortalecer a institución.
Esta campaña electoral tamén puxo de manifesto algo que non debería formar parte da vida universitaria: a circulación de rumores, bulos e campañas de desinformación que pouco teñenque ver cun debate académico serio. A universidade debería ser precisamente o espazo no que se defenda con máis firmeza o pensamento crítico, o respecto e a confrontación honesta de ideas.
Por iso sigo convencida de que o camiño correcto é o da transparencia, o debate aberto e a explicación clara dos proxectos e das propostas. A comunidade universitaria merece coñecer que modelo de universidade defende cada candidatura edecidir con liberdade.
Esta campaña demostrou algo positivo: existe un grande interese polo futuro da USC, o que demostra que segue a serunha institución viva, capaz de mobilizar ilusión e compromiso.
Agora toca decidir que dirección queremos tomar. Eu defendo unha USC máis ambiciosa, máis internacionalizada, máis conectada co seu tempo e coa súa contorna. Unha universidade que non se conforme con manter o prestixio do pasado, senón que traballe cada día para conquistar o futuro.
Porque unha institución con 531 anos de historia non pode permitirse ter un proxecto rutinario. A Universidade de Santiago ten que seguir sendo un motor de coñecemento, de progreso e de oportunidades para toda a sociedade. E ese é, precisamente, o compromiso que asumimos con toda a comunidade universitaria.
