O Grupo Municipal do Partido Popular de Santiago denunciou a situación das obras de urbanización da rúa García Lorca, que segundo sinala a formación están paralizadas na actualidade e xeran problemas de seguridade e mobilidade para a veciñanza da zona.
Os concelleiros José Ramón de la Fuente e Adrián Villa criticaron a xestión do goberno municipal formado por BNG e Compostela Aberta e aseguraron que a intervención, iniciada a partir dun proxecto procedente do anterior mandato, comezou “a destempo” tras ser licitada tarde polo actual executivo local.
De la Fuente afirmou que durante o desenvolvemento das obras apareceron liñas de servizos non previstas, unha circunstancia que, ao seu xuízo, evidencia unha falta de planificación previa. Segundo indicou, “o proxecto, herdado da administración anterior, foi licitado tarde polo goberno nacionalista, polo que as obras comezaron a destempo e sen a mínima dilixencia requirida”, engadindo que a aparición destas incidencias provocou a paralización dos traballos “sen unha data concreta que albisque unha solución”.
O edil popular sostivo que este tipo de situacións son habituais en intervencións urbanísticas, polo que, na súa opinión, deberían existir mecanismos de resposta rápida para resolver as incidencias que xorden durante a execución das obras. “Este tipo de incidencias, habituais en proxectos desta natureza, esixen unha resposta rápida e dilixente por parte do goberno municipal; lonxe diso, a xestión dos nacionalistas está sendo lenta e ineficaz”, afirmou.
PROBLEMAS DE SEGURIDADE E MOBILIDADE
Segundo explicou o grupo popular, o estado actual da rúa presenta treitos de beirarrúas incompletas e superficies irregulares, o que obriga ás persoas a transitar pola calzada. A esta situación súmase, segundo sinalaron, unha sinalización considerada insuficiente e o deterioro do firme nalgúns puntos, como no paso de peóns situado na confluencia coa avenida de Castelao.
De la Fuente advertiu de que a situación afecta especialmente á veciñanza dunha zona onde reside un número significativo de persoas maiores, algunhas con mobilidade reducida. “Esta é unha zona onde viven moitas persoas maiores, moitas delas con mobilidade reducida, cuxo tránsito cara as súas casas é agora mesmo unha aventura perigosa”, afirmou.
O concelleiro tamén sinalou que a sinalización provisional existente dificulta o uso dos pasos habilitados para peóns, circunstancia que, segundo indicou, incrementa os riscos durante o tempo que duren as obras.
RECLAMACIÓN DUN CALENDARIO PARA REMATAR OS TRABALLOS
Ante esta situación, o Partido Popular de Santiago reclamou ao goberno municipal que estableza un prazo inmediato, público e vinculante para retomar e finalizar os traballos de urbanización da rúa García Lorca. Ademais, solicitou a adopción de medidas temporais que garantan a seguridade viaria dos peóns mentres se desenvolve a intervención.
De la Fuente concluíu asegurando que “a incompetencia do goberno nacionalista está a converter un proxecto necesario nun risco diario para os nosos maiores e para calquera veciña e veciño que, simplemente, queira camiñar con seguridade polo seu barrio”.
