O Grupo Municipal Socialista de Santiago levará ao pleno deste mes unha pregunta sobre o futuro das cafeterías situadas en varios parques municipais, despois de que o concurso para a súa explotación quedase deserto o pasado verán. O concelleiro socialista Gumersindo Guinarte advertiu de que, a poucos días da chegada da primavera, a situación segue sen resolverse e todo apunta a que estes espazos continuarán pechados.
Segundo explicou o edil, o ano pasado o procedemento de contratación para os establecementos situados nos parques Eugenio Granell, A Granxa do Xesto e O Berce das Aves non se tramitou con suficiente antelación. Isto provocou, segundo indicou, que o proceso de licitación quedase deserto no verán, un momento no que a actividade xa estaba avanzada.
Guinarte sostén que esta situación non responde a unha circunstancia puntual, senón á falta de planificación na tramitación do contrato. O concelleiro lembrou que as empresas interesadas neste tipo de servizos necesitan contar cun período amplo de actividade, especialmente durante os meses de primavera e verán, que son os que concentran a maior afluencia de persoas aos parques.
“As empresas que poden estar interesadas neste servizo precisan que se licite con tempo suficiente para traballar e obter rendibilidade económica durante a primavera e o verán“, sinalou o concelleiro socialista, que insistiu en que estes establecementos ofrecen un servizo demandado pola veciñanza.
Desde o Goberno municipal, segundo explicou Guinarte, comprometeranse no seu momento a volver convocar o concurso nun prazo breve. Non obstante, o grupo socialista asegura que ata o momento non existe información pública sobre o estado do proceso nin sobre cando se retomará a licitación.
Ante esta situación, o PSOE preguntará no pleno cando prevé o executivo local iniciar o novo procedemento de contratación, co obxectivo de que as cafeterías poidan abrir na tempada con maior actividade e resulten atractivas para posibles concesionarias.
O grupo municipal considera que, se a licitación continúa atrasándose, Santiago podería afrontar un novo período de primavera e verán sen estes servizos en funcionamento, malia tratarse de espazos frecuentados pola cidadanía.
