A concelleira non adscrita Mila Castro reclamou que o contrato da auga volva ao pleno municipal para desbloquear a súa aprobación e criticou a actuación dos diferentes grupos políticos na corporación, aos que acusou de antepoñer os intereses electorais á resolución dos problemas da cidade.
Castro afirmou que durante os últimos días quedaron evidentes “dúas cousas”: por unha banda, que o BNG sente “remordemento de conciencia” polo bloqueo do contrato, e por outra que PP e PSOE estarían xa en clave electoral a máis dun ano das eleccións municipais previstas para 2027.
A edil referiuse ás explicacións ofrecidas pola alcaldesa tras o pleno no que non saíu adiante a renovación da concesión do servizo de auga. Segundo indicou, resultaba “complicado de entender” que se acusase ao Partido Popular de bloquear o contrato pola súa abstención cando o acordo non prosperou polos votos en contra do grupo nacionalista.
Castro sostivo que os votos favorables á proposta non quedaron sen efecto pola abstención de once concelleiros, senón “polo voto en contra dos seis concelleiros do BNG”, polo que considerou que a responsabilidade do bloqueo non pode atribuírse á oposición.
A concelleira tamén criticou a postura do Grupo Popular, ao que atribuíu “posicións cambiantes e erráticas” respecto ao contrato da auga. Lembrou que a formación votou en contra da concesión en setembro de 2022, apoiouna na comisión de estudo celebrada a comezos de febreiro e finalmente optou pola abstención no pleno.
Segundo Castro, estas variacións responden a que os partidos municipais “entraron xa en campaña electoral”, unha dinámica que, ao seu xuízo, afecta especialmente ao Partido Popular pero tamén ao Partido Socialista.
REFERENCIA Á SITUACIÓN INTERNA NO PSOE
Na súa intervención, a edil aludiu tamén a un acto celebrado en Santiago no que participaron cargos socialistas doutros municipios. Segundo sinalou, nel interviñeron representantes de Carballo, Ferrol e Pontedeume falando sobre a situación interna do socialismo compostelán.
Castro afirmou que mentres se fala de “feridas pechadas”, no partido continúa o debate sobre quen será o candidato ás eleccións municipais de 2027. “Se as feridas do socialismo están pechadas, será algo que dirán as nosas veciñas e veciños nas urnas”, apuntou.
CHAMAMENTO A PRIORIZAR OS PROBLEMAS DA CIDADE
Ante esta situación, a concelleira fixo un chamamento aos grupos municipais para centrar a actividade política nos asuntos pendentes da cidade, entre eles o propio contrato da auga.
Castro pediu que o expediente volva ao pleno municipal e reclamou ao BNG que permita a súa aprobación mediante unha abstención. Tamén instou ao Partido Popular a abandonar o que cualificou como “xogos” arredor deste asunto.
“Menos cálculo electoral e máis compromiso con Santiago”, afirmou, advertindo de que sería “un desastre para Santiago que a campaña electoral comece xa”, xa que, segundo dixo, iso podería provocar “bloqueos arbitrarios, crispación e titulares baleiros”.
A edil concluíu lembrando que a corporación municipal foi elixida en 2023 “non para facer campaña permanente, senón para sacar adiante os proxectos que a cidade necesita”.
