O Servizo de Extinción de Incendios e Salvamento de Santiago de Compostela realizou ao longo de 2025 un total de 1.923 intervencións, unha cifra lixeiramente inferior á rexistrada no exercicio anterior. Con todo, os datos amosan un incremento nos incendios, que alcanzaron as 210 actuacións, o que supón o número máis elevado desde o ano 2017.
Segundo os datos do balance anual do servizo, o descenso global das saídas —case un cento menos que en 2024— explícase principalmente pola redución dalgunhas tipoloxías de intervención. É o caso das actuacións por caída de árbores, que pasaron de 288 en 2024 a 141 no pasado ano, e das intervencións para retirar enxamios, que descenderon de 309 a 191.
Tamén diminuíron as actuacións relacionadas coa retirada de niños de insectos, en especial da avespa velutina, cun volume moi inferior ao rexistrado en anos anteriores. O máximo alcanzárase en 2017, con 1.359 intervencións deste tipo. A diminución está vinculada á adhesión do Concello de Santiago ao convenio coa FEGAMP, polo que é a empresa pública SEAGA quen se encarga destas tarefas.
Aumento de incendios e actuacións preventivas
Fronte a esta redución nalgunhas intervencións, outras tipoloxías rexistraron un aumento durante 2025. Entre elas destacan as inspeccións e labores preventivas, que pasaron de 512 actuacións en 2024 a 697 no último ano.
Tamén medrou o número de incendios atendidos polos bombeiros composteláns, que se incrementaron de 197 a 210 intervencións. Dentro desta cifra, os incendios forestais duplicáronse, ao pasar de 17 casos en 2024 a 34 durante 2025.
Formación e sensibilización da cidadanía
No ámbito da prevención, o servizo municipal impulsou diversas iniciativas de formación e sensibilización dirixidas á cidadanía, co obxectivo de mellorar a resposta ante situacións de risco e contribuír a reducir os seus efectos.
Ao longo do ano pasado, 650 escolares visitaron as instalacións dos bombeiros, onde participaron en actividades divulgativas sobre prevención e actuación ante emerxencias. Ademais, máis de 600 estudantes tomaron parte nas accións organizadas con motivo da Semana da Prevención de Incendios.
A actividade formativa completouse coa participación do servizo en máis de 35 simulacros realizados en empresas e edificios de pública concorrencia, nos que se puxeron en práctica protocolos de evacuación e actuación ante posibles emerxencias.
Novas incorporacións e mellora de medios
Durante 2025 tamén se produciron novas incorporacións ao cadro de persoal do Servizo de Extinción de Incendios e Salvamento. En total sumáronse cinco bombeiros-condutores, dúas bombeiras de xestión operativa e preventiva e unha auxiliar.
En canto aos medios materiais, o Concello adxudicou o contrato para a subministración de dous novos camións e un vehículo lixeiro, que está previsto que entren en servizo ao longo de 2026.
Celebración do patrón dos bombeiros
Coincidindo coa festividade de San Xoán de Deus, patrón dos bombeiros, o parque municipal celebrará este 8 de marzoun acto institucional que estará presidido pola alcaldesa de Santiago, Goretti Sanmartín, e no que tamén participará o concelleiro de Mobilidade e Convivencia, Xan Duro. O encontro servirá para recoñecer o labor desenvolvido polo servizo ao longo do último ano.
