A alcaldesa de Santiago, Goretti Sanmartín, anunciou que o Goberno local presentará na Xunta de Goberno do próximo luns, 9 de marzo, a proposta para declarar a cidade como zona de mercado residencial tensionado. A iniciativa chega despois de que o departamento municipal de Urbanismo completase os traballos técnicos necesarios para formular esta solicitude.
A rexedora fixo este anuncio diante dos medios de comunicación tras participar no acto institucional de lectura da declaración da Corporación municipal polo 8M, Día Internacional da Muller, no que tamén se realizou a entrega do Premio Xohana Torres.
Segundo explicou Sanmartín, os informes e documentación necesarios para iniciar o procedemento xa están finalizados, polo que o seguinte paso será a súa aprobación no órgano de goberno municipal. A alcaldesa indicou que será o concelleiro de Urbanismo, Iago Lestegás, quen detalle publicamente o contido da proposta unha vez sexa presentada formalmente.
A declaración de zona de mercado residencial tensionado é unha figura prevista na normativa estatal de vivenda e permite ás administracións aplicar medidas específicas para actuar sobre o mercado do alugueiro, co obxectivo de conter os prezos e mellorar o acceso á vivenda.
Tras a aprobación municipal, o documento deberá ser remitido á Xunta de Galicia, que é a administración competente para validar esta declaración. Neste sentido, Sanmartín manifestou a súa expectativa de que o procedemento avance con celeridade: “Esperemos que se sexa aprobada de maneira rápida pola propia Xunta”, sinalou.
