A concelleira do Grupo Municipal Socialista en Santiago, Marta Abal, advertiu dun “preocupante freazo” na actividade urbanística da cidade, unha situación que, segundo indicou, se desprende dos datos recollidos nos informes elaborados polos Colexios Oficiais de Arquitectas e de Arquitectos Técnicos de Galicia.
Segundo explicou a edil socialista, no ano 2025 construíronse en Santiago tan só 65 vivendas novas, unha cifra que supón un descenso do 69% respecto ao ano anterior. Para Abal, este dato reflicte unha perda de dinamismo na actividade construtiva da capital galega.
A concelleira sinalou ademais que Santiago está a visar menos vivendas novas que outros municipios galegos como Ames, Carballo, Lugo ou Ferrol, un feito que, ao seu xuízo, evidencia a situación de estancamento que atravesa o sector na cidade.
Abal tamén puxo o foco na evolución das licenzas urbanísticas, que, segundo indicou, presentan unha tendencia á baixa. Durante o ano 2025 tramitáronse 161 expedientes de nova construción e rehabilitación, o que representa unha caída do 10% respecto a 2024.
A concelleira socialista relacionou estes datos co funcionamento da administración urbanística municipal. Segundo afirmou, “as demoras na xestión urbanística para a concesión de licenzas e a falta de desenvolvemento de solo finalista para poder construír vivenda nova son algunhas das causas que están detrás destes malos datos”.
Neste sentido, advertiu de que “sen axilidade administrativa, nin solo dispoñible, a cidade queda paralizada”, polo que considera necesario adoptar medidas que permitan reactivar a actividade.
Abal mostrou tamén a súa preocupación pola resposta que está a dar o Goberno municipal ante esta situación. En concreto, criticou a decisión de reorganizar internamente os servizos municipais, asignando ao Servizo de Rehabilitación e Vivenda novas funcións relacionadas coa tramitación de licenzas urbanísticas.
Segundo a concelleira socialista, esta medida resulta cuestionable tendo en conta que hai apenas un mes a Xunta de Goberno Local acordou devolver preto dun millón de euros en axudas á rehabilitación procedentes do plan estatal por non seren executadas dentro do prazo previsto.
Ante este escenario, o Grupo Municipal Socialista defende a necesidade de cambiar o rumbo da política urbanística municipal. Abal apostou pola posta en marcha dun plan de choque que permita reactivar a actividade construtiva e urbanística na cidade.
Segundo explicou, este plan debería incluír a simplificación real dos procedementos administrativos e a automatización dos trámites, aproveitando as ferramentas da administración electrónica implantada na pasada lexislatura.
A concelleira socialista concluíu reclamando “non máis parches organizativos, senón medidas de fondo para reactivar a cidade”.
