O líder do Partido Popular de Santiago, Borja Verea, achegouse nos últimos días á tenda ‘A Gata Tola’ tras facerse público o seu peche definitivo, co obxectivo de trasladar persoalmente o seu apoio ao responsable do negocio, coñecido como Santi, e recoñecer a traxectoria dun establecemento con presenza consolidada no ámbito cultural compostelán.
Segundo explicou o propio Verea, cliente habitual do comercio desde hai anos, a visita serviu para agradecer o trato recibido e a dedicación mantida ao longo do tempo. “Para min, como para moita xente, A Gata Tola foi sempre moito máis ca unha tenda. Foi un lugar ao que volver, no que descubrir novas historias e no que Santi sempre sabía que recomendarche”, manifestou.
Durante o encontro, o portavoz popular puxo o foco no papel que desempeñou o local como punto de encontro para persoas afeccionadas ao cómic e á cultura na capital galega. Na súa intervención, destacou que se trataba dun espazo que ía máis alá da actividade comercial habitual, pola relación establecida coa clientela ao longo dos anos. “Hai tendas ás que vas mercar, e outras ás que vas porque forman parte da túa rutina, da túa historia. A Gata Tola era destas últimas”, sinalou.
Verea tamén quixo facer fincapé no labor desenvolvido polo responsable do establecemento á fronte do negocio, incidindo no trato personalizado e na continuidade da relación cos clientes. “Sempre tivo unha recomendación acertada, sempre unha conversa pendente. Esa maneira de atender, de coñecer aos clientes e de compartir paixón polo que fai é o que converte unha tenda nun lugar especial”, afirmou.
O anuncio do peche de ‘A Gata Tola’ supón, segundo indicou, a desaparición dun referente para parte do público afeccionado ao cómic na cidade. “Vai quedar a nostalxia dun espazo que acompañou a moitas persoas ao longo dos anos. E tamén o recordo de alguén que fixo que entrar pola porta sempre pagase a pena”, concluíu o dirixente popular.
