Dúas nenas resultaron feridas este martes despois de sufrir un atropelo na rúa do Restollal, en Santiago de Compostela, segundo informou o servizo de emerxencias 112 Galicia.
O aviso produciuse arredor das 17:50, cando un particular contactou coa Central de Emerxencias para alertar do accidente. Segundo trasladou, o vehículo implicado quedara na vía e interrompía a circulación na zona.
Tras recibir a chamada, o 112 mobilizou ao Servizo de Urxencias Sanitarias de Galicia-061, que procedeu á evacuación das dúas menores a un centro hospitalario. Ata o lugar desprazáronse tamén efectivos da Policía Local de Santiago, así como os bombeiros da cidade e membros da Agrupación de Voluntarios de Protección Civil.
As circunstancias concretas nas que se produciu o atropelo non transcenderon polo momento. A intervención dos distintos equipos permitiu atender ás persoas afectadas e restablecer a circulación na rúa do Restollal.
