As persoas usuarias do Centro Sociocultural de Fontiñas decidiron organizarse ante a suspensión das aulas de xogo, un servizo vinculado á dinamización e mediación sociocultural da rede municipal de centros. A interrupción desta actividade prodúcese no contexto da folga iniciada o luns 16 polo persoal da empresa Serviplus, prestataria do servizo, que denuncia catro meses de impagos.
Segundo trasladan as familias afectadas, o cesamento das aulas de xogo está a ter impacto na conciliación da vida persoal e laboral no barrio compostelán. O servizo viña funcionando como un recurso habitual para atender ás crianzas en horario de tarde, polo que a súa desaparición supón, segundo indican, a perda dun apoio que consideraban consolidado no ámbito da colaboración das administracións públicas coa conciliación.
O conflito laboral que afecta ao persoal da empresa Serviplus inclúe tamén a imposibilidade de acceder á prestación por desemprego, xa que, segundo explican, a empresa non emitiu as correspondentes cartas de despedimento, malia que o Concello revogou a orde de continuidade da prestación do servizo.
SOLICITUDE DE CESIÓN DUN ESPAZO MUNICIPAL
Ante esta situación, un grupo de nais e pais do barrio acordou impulsar unha petición colectiva dirixida ao Goberno municipal. A proposta consiste na cesión dunha sala no propio CSC de Fontiñas durante tres días á semana, en horario de 18:00 a 20:00, co obxectivo de manter un espazo de encontro para as crianzas baseado no xogo e na socialización.
A iniciativa contaría coa colaboración voluntaria do animador que viña sendo responsable da actividade, segundo sinalan as familias promotoras. O venres 20, en apenas dúas horas, recolléronse numerosas sinaturas de apoio entre as persoas usuarias do centro.
PETICIÓN DE MUNICIPALIZACIÓN DO SERVIZO
Na mesma solicitude, as familias instan o Executivo local a asumir directamente a xestión do servizo, polo menos de maneira transitoria, mentres non se adopta unha solución definitiva. Na súa opinión, a fórmula máis axeitada sería a municipalización permanente das aulas de xogo e do servizo de dinamización sociocultural.
As persoas asinantes consideran que a xestión directa permitiría garantir a continuidade da actividade e evitar situacións similares no futuro. Polo momento, están á espera dunha resposta por parte do Concello de Santiago sobre a viabilidade da cesión do espazo e sobre as medidas que se poidan adoptar respecto ao servizo.
