O Concello de Ames e a Real Academia Galega (RAG) estenden ao primeiro ciclo de infantil o programa ‘Modo galego, actívao!’, á vez que reforzarán as actividades formativas para familias e educadores.
En concreto, familias e persoal das escolas infantís municipais de Milladoiro e Bertamiráns súmanse “a unha experiencia singular de promoción e análise do galego na infancia”, explican ambas as institucións.
‘Modo galego, actívao!’ comeza esta semana con senllas charlas dirixidas ás comunidades educativas dos dous centros impartidas polo escritor, divulgador e director do Servizo de Normalización Lingüística da Universidade de Santiago de Compostela (USC), Manuel Núñez.
“O reto da inmersión lingüística”, sinalan, comezará o 13 de maio “co propósito de animar a máis de 2.000 nenos e nenas de nove centros educativos a empregar o galego polo menos durante tres semanas en todos os contextos da vida”.
