Segundo explicou a comisaria xefa, Nuria Palacios, a voz de alarma activouse arredor das 10:00, momento no que se procedeu á evacuación controlada do persoal. “A orixe non o podemos determinar aínda. O que sabemos é que foi nunha zona por baixo da planta principal, nun soto, onde hai acumulación de pneumáticos. Por iso o fume é tan denso e está a provocar esta nube que é rechamante e super molesta”, indicou.
O dispositivo despregado inclúe 13 bombeiros que deben ir relevándose nas tarefas de extinción, xa que as condicións do lugar impiden permanecer durante períodos prolongados no interior. A alcaldesa de Santiago, Goretti Sanmartín, que se desprazou ata o punto xunto coa comisaria, cualificou o fume de “tóxico” e sinalou que as tarefas de ventilación serán determinantes para dar por finalizada a intervención.
Pasadas as 11:30, procedeuse ao corte da praza na que se atopa o edificio, no ámbito do centro histórico compostelán, co obxectivo de facilitar o traballo dos equipos de emerxencia e garantir a seguridade na contorna.
En relación cos danos materiais, Palacios indicou que polo momento só hai constancia de afectación na planta baixa, aínda que precisou que “non os podemos valorar aínda”. A comisaria solicitou tamén “paciencia” ás persoas que tiñan cita na Oficina de Expedición do DNI e na Oficina de Estranxeiría, xa que descoñece cando poderá recuperarse a “normalidade” na actividade administrativa.
O lume mantense localizado nunha área concreta do inmoble, segundo trasladaron as autoridades no lugar dos feitos, mentres continúan as tarefas de control e ventilación para disipar o fume acumulado no interior do edificio. O delegado do Goberno en Galicia, Pedro Blanco, en declaracións aos medios, detallou que o lume está “absolutamente controlado” e apuntou a un curtocircuíto nunha das zonas de tiro da Comisaría como a causa do incendio.
EVACUACIÓN COMISARÍA E ORIXE
A voz de alarma deuse ao redor das 10.00 horas e, a continuación, procedeuse á evacuación da comisaría de forma “controlada”, cando se comprobou que non había persoal afectado. Posteriormente, pasadas as 11.30 horas, procedeuse ao corte da praza na que está emprazado o inmoble, situado no centro histórico. En relación a danos materiais, a comisaria só ten constancia polo momento da planta baixa. “Non os podemos valorar aínda”, indicou. Ademais, pediu “paciencia” ás persoas que tiñan cita na Oficina de Expedición do DNI e a Oficina de Estranxeiría, xa que descoñece cando se poderá retomar a “normalidade” na comisaría.
