A exposición correu a cargo de persoal da empresa santiaguesa Brétema Ingeniería S.L., adxudicataria do contrato por un importe de 40.474,50 euros (IVE incluído), o que supón unha redución do 18,6% respecto do orzamento base de licitación, fixado en 49.731,00 euros.
No acto estiveron presentes o alcalde de Ames, Blas García; o concelleiro de Obras e Servizos Básicos, Gustavo Nieto; o concelleiro de Xestión do Medio Natural, Javier Antelo; así como persoal técnico municipal, representantes da EPEL Augas de Ames, Policía Local, Brigada municipal de Obras, Agrupación de Protección Civil e da empresa concesionaria Urbaser.
O contrato inclúe dúas actuacións complementarias. Por unha banda, realizouse unha modelización hidráulica bidimensional da zona inundable, coa identificación de puntos críticos en distintos escenarios de risco. Por outra, elaborouse un plan operativo de resposta ante emerxencias, que integra a normativa vixente —INUNGAL, PXRI e o Real decreto 903/2010— e define os protocolos de actuación en caso de inundación.
O estudo centrouse especialmente en Bertamiráns, xa que as ARPSIs deste núcleo están clasificadas no grupo IV da escala de medición, o que implica alta perigosidade e potencial de danos na contorna. A análise permitiu delimitar as áreas máis expostas e formular medidas correctoras orientadas á prevención e á planificación.
Segundo se explicou durante a presentación, o obxectivo é reforzar a resiliencia do municipio fronte ás inundacións, avanzar na dixitalización da xestión do risco e aliñar as políticas locais cos criterios ambientais e tecnolóxicos establecidos polo Plan de Recuperación, Transformación e Resiliencia.
Entre as ferramentas previstas inclúese unha aplicación web, que se poñerá a disposición da cidadanía nas vindeiras semanas. A través dela poderanse consultar as zonas potencialmente afectadas por inundacións e as áreas ás que non se poderá acceder en caso de episodios adversos.
Esta plataforma permitirá visualizar o comportamento do municipio ante diferentes escenarios, facilitando información útil tanto para a veciñanza como para os servizos de emerxencia.
O estudo e o plan forman parte do proxecto ‘Ames Dixital Water’, unha iniciativa orientada á transformación integral do sistema de abastecemento e saneamento do concello. O programa está financiado polo Plan de Recuperación, Transformación e Resiliencia mediante fondos NextGenerationEU, dentro do PERTE de Dixitalización do Ciclo da Auga.
O investimento global ascende a 1.356.375,49 euros. Deste importe, o 83,40% —1.131.309,77 euros— está financiado con fondos europeos, mentres que o 16,60% restante —225.065,72 euros— procede de recursos municipais.
Ademais do estudo de inundabilidade e do plan de protección civil, o Concello xa adxudicou contratos para o inventario das redes de abastecemento e saneamento, a mellora do sistema de abastecemento municipal e a elaboración dun estudo para o saneamento e depuración de pequenos núcleos.
A través destas actuacións, o goberno local pretende avanzar cara a unha xestión máis eficiente e eficaz do ciclo integral da auga, desde a captación ata a reutilización, coa intención de mellorar a planificación, optimizar recursos e consolidar un modelo de gobernanza da auga aplicable a contornos semiurbanos con retos semellantes.
